東方宮蘭州牛肉拉麵 (Closed)

蘭州拉麵係大陸就成日見，好少係香港見到，今次亦都係第一次係香港食蘭州拉麵，朋友介紹嘅，咁都俾佢發現到呢間店，位置係銅鑼灣地鐵站C出口，行五分鐘左右，平時好少會行咁入。間舖唔大，不過都幾乾淨，下午茶時段去嘅，所以人唔多。朋友好快決定到食乜嘢，叫咗幾串羊肉串，一份大盤雞，仲有烤雞翼。冇諗到最好食嘅，居然係烤雞翼，好入味，孜然嘅味道好香，不過有兩隻嘅背面有點lung，如果唔係就完美喇。羊肉串都ok嘅，大部分係瘦肉，冇乜肥肉，鍾意瘦肉嘅就會覺得好好，但味道冇雞翼香。大盤雞睇上去好吸引，但味道唔夠，既唔夠香又唔夠咸。總體而言，性價比都算好高，感覺同深圳價錢差唔多，味道都唔錯。