鹿鳴春飯店 (Closed)

舊式京菜飯店，真係買少見少，松竹樓，冇咗！新洪祥興，冇埋！今時今日企得最硬淨嘅，得返【鹿鳴春】成日都想去【鹿鳴春】，但打去訂位，答案永遠都係爆晒啦！上星期唔知行咩運，居然話有位，我直情激動到眼濕濕，含住淚咁同佢講…十一位吖，唔該！當晚一坐低，唔理三九廿七，先整個雜錦拼盤，跟住先慢慢打開餐牌check it out……北京填鴨鍋燒肘子鹽爆管廷宮保蝦球松鼠魚鴨鬆生菜包沙鍋雲吞雞京燒羊排通通叫晒！個雜錦拼盤一上枱…嘩！成個化寶盤咁大，淨係氣勢都贏哂！跟住嚟個StarWar雲吞雞…嘩！又係成個金塔咁大，飲極都仲有！鹽爆管廷，而家好多地方都食唔到，爽得嚟又冇「壓」味！鍋燒肘子，肥美…入味！京燒羊排，其實我麻麻地羊，但燒到酥軟甘香，我都隊咗兩件！其他餸菜都有返咁上下水準……就係除咗隻北京填鴨！皮唔脆！又瘦！肉又實！以d肉嘅堅韌程度，我斷定隻填鴨係California會員，仲起碼做過半年以上Gym！唉……本來好地地嘅一餐，就俾隻California填鴨破壞晒！