新金榮小廚

Open Now

Now Closed

新墟麒麟徑兩旁有好多大排檔，住咗喺元朗八年都只係試過兩三間，今日過開嚟呢頭搵食，又搵一間嚟試下。受害於疫情嘅關係，晚市只能夠買外賣；但係另一方面亦都係受惠於疫情嘅關係，宜家喺新金榮小菜外賣自取有八五折，姐姐好細心咁樣包得好靚，仲配上好多醬料，難得拎到返屋企都仲係熱熱地，發泡膠盒保留到應有嘅鑊氣，為冬日帶嚟一絲暖意。馳名鹵水鵝，鹵水鵝鹵得入味，係非一般嘅入味，鵝肉軟嫩，好耐無食過咁高質素嘅打冷，墊底有鹵豆腐同花生， 鹵水花生用嚟送啤酒一流 ，點埋隨附打冷必備嘅蒜蓉辣椒酸醋，無敵。菠蘿咕嚕肉，咕嚕肉炸得夠脆身，揀咕嚕肉唔揀生炒骨就係想入口啖啖肉，新金榮嘅咕嚕肉肥肉唔多，更加見食，味道酸甜，十分開胃，配菜有青椒、紅椒、菠蘿同洋葱，好多人都視之為下欄摒棄，但係我就鐘意用佢地同啲肉夾住食，so refreshing。避風塘粟米， 大排檔嘅避風塘系列最能夠表現出功架。新金榮嘅避風塘系列除咗應有嘅炸蒜、辣椒同香葱之外，仲有炸米粉，炸米粉令到整個菜式份外酥脆，粟米嘅清甜，夾埋炸蒜辣椒嘅惹味，佐酒一流。西蘭花蝦仁花枝片，蝦仁夠哂大隻又夠爽， 花枝片火喉啱啱好， 少少彈牙，又爽口， 點埋蝦醬更添咸鮮香氣。