十二味麻辣小當家 (Closed)

呢間十二味雖然位處係銅鑼灣，但因為佢係係偏靜既橫街，所以如果唔係朋友介紹都差點走寶。十二味佢地主打應該就係特色麻辣鍋，可以根據自己既喜好去揀選鍋底既辣度，同時都可以揀加麻，走芫𦭓等等。揀完鍋底，就可以揀餸，我地就揀左雞胸肉、田雞、土豆等等，而餸既價就由$20-$50不等，分量來講我地3個人share食都夠，再配多個白飯，真係無得嘆！我相信唔少聲稱麻辣既餐廳來到香港之後都因為要遷就返香港人既食辣程度而減低麻辣既分量。而呢度令人最驚喜係佢真係做到又麻又辣，雖然已經食到個嘴全部麻曬，但都停唔到口。除左呢一大pan特色麻辣鍋，我地仲叫左川式口水雞同霸王辣子雞。口水雞來講我幾鍾意佢個汁，配雞送飯又係一流，只可惜佢既雞我略嫌不夠滑嫩，雞肉有小小「孩」，影響口感。而辣子雞既分量就適中，唔會好似其他餐廳咁得乾辣椒而好少雞。呢餐埋單三個人五百幾蚊左右，平均每人一百蚊起，銅鑼灣區來講算差唔多，最緊要既係佢真係做到麻辣既風味，鍾意食辣既朋友一定要試！