MeeMeeMe (Closed)

今日去黃竹坑辦事，辦完之後已經係放工時候，約咗響黃竹坑返工嘅閨蜜晚餐。去介紹我嚟到呢間餐廳試吓。呢間餐廳都好近黃竹坑地鐵站，但係就響橫街一個比較低調嘅位置。我哋叫咗一個burger同一個意粉share食，然後再每人叫咗一杯飲品。軟殼蟹漢堡配薯條漢堡包賣相好吸引，軟殼蟹超大隻，突晒出個漢堡包之外。一口咬落去漢堡包經過烘焗，香脆鬆軟，軟殼蟹香脆，但一點都不油膩，炸漿好薄，啖啖肉而且仲有蟹膏，連同新鮮爽脆嘅生菜同蕃茄加上千島醬一齊食，好滿足。薯條係粗薯條，新鮮炸起，條條金黃香脆，內裏粉嫩，薯條上面仲灑左啲粗鹽，沾上茄汁一齊食，冇得輸。蟹膏蟹肉意粉意粉份量好多，蟹肉好澎湃，鋪滿晒成碟意粉，保證你每一啖都有蟹肉，蟹迷必愛。意粉嘅醬汁都幾香濃，而且好掛麵，意粉軟硬度適中，唔錯。芝芝火龍果大大杯，顏色好靚，飲得出係由新鮮嘅紅火龍果打成，好清甜，芝士奶蓋鹹香鹹香，同火龍果果汁好夾。芝芝莓莓朋友揀咗呢杯，佢都讚呢杯飲品好好飲，又新鮮多種雜莓打成，勁多芝士奶蓋，佢好鍾意，減肥都要飲完先再減。總括而言，我哋都對呢餐好滿意，朋友冇介紹錯，呢間食物味道唔錯，物有所值。下次再嚟可以再試吓去其他東南亞風味嘅麵食。