利寶閣 (Closed)

聖誕假期boxing day， 食了幾天西餐今天下午轉吃點心， 想試下點心放題， 上網揀了利寶閣， 位於尖沙咀彌敦道100號The ONE 17樓， 相當方便。 早上訂位店員安排我們坐在窗邊附近， 望住維港靚景飲茶心情特別好。點心放題$148一位， 茶位$15一位再加一， 加埋大約$180一位，每位送花膠灌湯餃和原隻鮑魚酥一份。 花膠灌湯餃熱辣辣都幾好， 鮑魚酥鬆化好味。 放題點心紙上， 我比較喜歡蝦餃、燒賣、腸粉和牛肉球， 還試了其他款式蘿蔔糕、鳳爪、 鹹水角、排骨和叉燒包等等， 全部點心即叫即蒸， 蝦餃不算大粒但皮薄餡靚， 燒賣新鮮肉質紮實， 鮮蝦腸粉大大粒， 牛肉球口感鬆軟，最後還有雪糕、 楊枝甘露和杏仁茶做甜品。整體來說環境好， 服務質素唔錯， 點心種類中規中矩， 如果有炒粉麵飯就更加理想。