Candies Foodies (Closed)

今日同朋友係尖沙嘴行左成日街，鬼死咁肚餓又咁岩想食西餐，醒起之前家姐有推薦過呢間樓上西餐廳話又抵又好食又近地鐵站，就決定去試試佢。雖然話係樓上餐廳，但係都好易搵，上到去發現佢唔係好大間，滿左大半間，好彩我地仲有位。我地兩個懶人廢事煩食咩所以就直接點set，個set有湯、有頭盤、有pasta/risotto、有主菜仲跟埋野飲，$388真係抵！逐樣講下啦，我地個日個湯係雜菜湯，唔錯，足料又好飲，絕對唔係稀到成碗水個d。頭盤我地揀左炸薯條，岩岩炸起送出黎熱辣辣，點埋佢個黑松露蛋黃醬係正嘅！個龍蝦risotto係creamy同龍蝦鮮味兼備，仲有半邊龍蝦食，肉質彈牙有口感，絕對唔係渣野。主菜我地叫左肉眼扒，成9安士，都幾大塊。塊牛扒面見到個粗黑椒粒，聞落去好香，但係食落去又唔會覺得太辣，同個肉味match到岩岩好，肉質細嫩又juicy，無overcook到抵讚！野飲方面佢本身包普通餐茶，但係我地見d special drink好吸引，每人加左$15轉特飲。杯陽光熱情果味好出，好清新解渴，杯oreo沙冰就好重oreo味，仲有我最中意嘅忌廉係面，正！呢餐我同朋友兩個都食到超飽超滿足，埋單先$460，