Video
Read full review
2024-06-14
213 views
第一句打重點：開心果系列完全係伏，只要你稍微對開心果有少少執著同期望，你就唔應該試。有日同閨蜜傾起TGG呢個集團，食過佢嘅十里係高質餐廳。閨密話想試下旗下呢間新式和洋食。最近仲推出咗我地當中有人特別中意嘅開心果限定，咁就緊係講到就約。揀咗去銅鑼灣呢間，冇特別訂位，亦唔駛排隊，門口有隻貓公仔吸引眼球，環境尚算舒適。三個人叫咗個二人Set,另外再散叫咗一件壽司塔可，同三樣開心果產品。二人Set望落幾抵，好似有唔少嘢食，1個前菜，1個小食，1個意粉，2個塔可，1個甜品同2杯嘢飲。但套餐彈性奇~~~低，除咗個餐只有比較普通嘅菜式選擇（見到主餐牌有啲特別嘅單點，但個餐冇得揀），連嘢飲都只係得咖啡同茶。所有特式飲品需要+$18至$38。但你以為加錢就得？錯喇，佢都係限死你5選1。對主餐牌其他飲品有興趣，你只可以另外再單點。最後揀完想食啲吸引少少嘅嘢，個餐由$498升級到$594。味道方面，老實講，食落冇咩驚喜，對唔住埋單四位數嘅價錢。前菜：牛油果角切魚生沙律，尚可，但柚子醬油味太出，蓋過牛油果本身個味，冇辦法令幾種食材味道加乘，感覺打折。小食：炸蠔配檸檬醬，皮夠脆，但蠔大小中等，熱辣辣出菜，叫做到
有日同閨蜜傾起TGG呢個集團，
食過佢嘅十里係高質餐廳。
閨密話想試下旗下呢間新式和洋食。
最近仲推出咗我地當中有人特別中意嘅開心果限定，
咁就緊係講到就約。
揀咗去銅鑼灣呢間，冇特別訂位，亦唔駛排隊，門口有隻貓公仔吸引眼球，環境尚算舒適。
三個人叫咗個二人Set,
另外再散叫咗一件壽司塔可，同三樣開心果產品。
二人Set望落幾抵，好似有唔少嘢食，1個前菜，1個小食，1個意粉，2個塔可，1個甜品同2杯嘢飲。
但套餐彈性奇~~~低，除咗個餐只有比較普通嘅菜式選擇（見到主餐牌有啲特別嘅單點，但個餐冇得揀），連嘢飲都只係得咖啡同茶。
所有特式飲品需要+$18至$38。但你以為加錢就得？錯喇，佢都係限死你5選1。對主餐牌其他飲品有興趣，你只可以另外再單點。
最後揀完想食啲吸引少少嘅嘢，個餐由$498升級到$594。
味道方面，老實講，食落冇咩驚喜，對唔住埋單四位數嘅價錢。
前菜：牛油果角切魚生沙律，尚可，但柚子醬油味太出，蓋過牛油果本身個味，冇辦法令幾種食材味道加乘，感覺打折。
小食：炸蠔配檸檬醬，皮夠脆，但蠔大小中等，熱辣辣出菜，叫做到基本。配個檸檬醬，唔算好夾，都係蛋黃醬會配啲⋯
主菜1: 軟殼蟹意粉配蟹肉及蕃茄忌廉汁，唯一有啲驚喜嘅菜式，意粉醬極多，每條意粉都掛到好多醬，味道唔會酸仲帶啲甜。忌廉適度，唔會太稀或太杰，軟殼蟹算大隻，好評。
主菜2: 壽司塔可（鰻魚玉子/香葱吞拿魚蓉牛油果醬/辣味帆立貝）。塔可，即TACO，墨西哥脆餅主意融入壽司，概念幾得意。主要打卡用，抵讚嘅係面果層代替咗墨西哥脆餅嘅天婦羅紫菜，一口咬落去幾脆。但入面都只係普通包咗啲壽司飯，上面放咗啲普通到唔再普通嘅材料，例如兩三片鰻魚同玉子，唔值錢嘅吞拿魚蓉同冇牛油果味嘅牛油果醬。老實講，原價$72係一啲都唔值，食兩件一樣材料嘅軍艦都只係$30⋯單點嘅帆立貝塔可反而驚喜少少，個辣味幾出，但相對帆立貝用料就唔係新鮮，因為可以用辣嚟掩蓋。
飲品：香桃富士梳打幾清甜，但因為跟餐加錢都冇咩飲品可以揀，所以略過。
甜品：需要連埋開心果嚟講。
老實講，除咗失望冇嘢好形容。佢又唔係難食，但對喜歡開心果嘅人嚟講真係極為失望。
開心果拿破侖：好多開心果醬，但個醬冇開心果味。唔係特別靚嘅醬嚟，個綠色綠到似抹茶。價值$118嘅甜品，其實可以用料好少少，靚嘅開心果醬，少少都已經好香好好味。呢個甜品係一啲都唔香，只有甜。就連拿破侖最基本，脆酥皮佢都做唔到，個皮咬落偏軟，冇牛油香。講到底唔知食咗乜。
開心果聖代：仲離譜，$98，大量脆米，成杯都係脆米。醬得少少，連乾果都唔多，呢個價錢去超市買個脆米早餐可以食到你上天堂，$98俾佢就係買果少少手工麻糬，仲要冇咩味。
開心果有機豆乳拿鐵：作為Latte冇奶味，冇香味，冇豆味，冇開心果味。唔知飲咗咩。
最後先講柚子清酒Tiramisu,，甜度比普通Tiramisu高少少，酒味就成枝吱咗都唔係好食到，得意係幾得意，但太Hea，做法亦肯定唔係用雞蛋，只係少女時代係屋企會整嘅Tiramisu初級版。
成餐咁就過一千蚊。
非常奉勸大家唔好中伏個開心果限定，貴，但完全唔係開心果。你要食開心果，出面好多甜品店有其他好選擇。
套餐亦唔抵食，單點幾個意粉或者意大利飯仲好。
值得一讚嘅係我地坐到10點幾先趕我地走，阻住哂收工都唔會話態度差。坐係度傾計都冇咩約束。以閨密聚會嚟講係唔錯。
Post