SAYAM Thai/Bar (Closed)

朋友最鍾意搜羅各區優質小店美食，今日就帶咗我去到位於銅鑼灣嘅ŚAYĀM。從大街走到小巷，再搭升降機，就發掘到呢一間充滿特色嘅泰國餐廳。餐廳以藍色作主調，非常有情調，就算唔飲酒坐喺入面都有微微嘅醉意。呢度嘅食物選擇未算豐富，但以小店來講都已經相當出色。配合返咁Chill嘅環境，當然要叫返兩杯飲品，呢杯Chiang Mai Darling係橙汁、桃、紅莓嘅結合，甜中帶微酸，充滿熱帶感覺。Virgin Thaijito就係荔枝、青檸、薄荷梳打，最適合炎炎夏日飲番杯。小食拼盤有春卷、蝦餅、雞肉卷、單骨雞翼、炸魷魚鬚同泰式青芒果沙律，仲會配上辣椒醬同泰式辣汁，份量相當多，絕對值回票價。大蝦冬陰功炒飯味道香口，唔算太辣，好啱香港人口味，而且大大隻大蝦放喺飯面，非常之有氣勢。椰菜苗可以選擇以蝦醬、辣醬、蒜蓉、馬拉盞拌炒，而我就揀咗蝦醬，啖啖充滿鹹香。呢度真係好適合約朋友嚟飯聚，無論三五知己定大班朋友都咁啱feel。