利寶會館

Open Now

Now Closed

難得放假可以接老婆收工，順便係附近食埋晚餐先歸家，老婆揀左利寶會館，因為晏就食過覺得有質素。去到見到利寶推出左晚市套餐，有翅有乳鴿食，價錢唔貴，當然要試下。首先上枱係濃湯雞煲翅，飲落雞湯香濃清甜，配上一梳梳魚翅，口感Q彈，份量仲足，有成三兩咁多。招牌脆乳鴿外皮炸得脆卜卜，鴿肉嫩滑多汁，越食越惹味。套餐仲包一人一小菜，我哋揀左菠蘿咕嚕肉同薑蔥豆豉雞煲，咕嚕肉外脆內軟，配上新鮮菠蘿，甜酸度剛剛好。薑蔥豆豉雞煲上枱滋滋聲，新鮮熱辣，薑蔥豆豉相當入味，雞肉入口嫩滑，美中不足既係份量比較小。主食係鮮蝦荷葉飯，食落荷葉香好濃烈，飯粒有咬口之餘帶點Q彈，配料都好足，食完啱啱好飽肚。甜品係蛋白杏仁茶，杏仁香氣濃烈，入口滑溜有蛋白咬口，甜而不膩，相當唔錯。