Double Tree (Closed)

星期五六日黎灣仔船街，除了多人還是多人。有喺灣仔做野既朋友話我知Double Tree既dinner menu好抵玩，所以就黎左試喇👋🏻 一打開menu，五道菜包任食甜品都只係158/位，平過放題多多聲，唔怪得咁旺場！主菜方面，我地揀左ribs同豬手：先講個ribs，肉質幾嫩滑，幾軟腍，唔會燒到乾哂，一刀可切到底。而且肋骨肥瘦分明，調味恰如其分，不蘸黑椒汁亦可。加上份量非常足夠，配埋意粉一定夠哂飽肚👍🏻咸豬手同樣大大份，上枱夠哂震撼。豬手肉質就比較鞋，但總算咬得落。調味方面幾出色，燒汁都黑椒汁都有，任君選擇。重點係豬皮咬落非常煙韌，係成道菜最好食既地方！呢度既dinner一大賣點係有任食甜品，由cheesecake, creme brûlée 到火焰雪山都有！但由於我地太飽既關係，一人食左一樣就算😂Creme brûlée 係正常水準，唔會過份甜，都幾推介。相反tiramisu就可能雪得耐左，唔係好濃味。另外，$158既dinner包埋前菜同湯。煙三文魚凱撒沙律presentation幾好，但略嫌三文魚可能雪得太耐，有啲凍同淡味😂 餐湯有忌廉、雜菜同龍蝦湯揀，正常水平。