陵發潮州白粥 (Closed)

如果想食潮洲打冷檔今時今日真係淨番唔多，全靠朋友帶我去陵發打冷先至有機會回味一番。 由於六點半到達時間尚早可搵到張細枱兩個人坐，唔洗搭枱。 朋友介紹一定要食呢度嘅蠔餅，我實會鐘意喎。另外，我點咗牙帶魚、生腸拼鵝腸、花生鳳爪， 轉個頭啲食物就陸陸續續送上。蠔餅大槐又厚睇落平平無其，點知原來裡面唔係一般嘅蠔仔係Jumbo蠔仔，大過平時嘅兩、三倍非常飽滿肥美而且蠔數量頗多，粉漿適中兼極之脆身放耐D都唔易淋，咁香口送啤酒最正。牙帶魚比較少食點知好有驚喜， 一碟有六件而每件魚外面都鹽味煎到脆卜卜，魚肉白雪雪有彈性非常新鮮，一邊一邊感覺比英式炸魚還要好味。 嚟打冷緊係要食吓打冷至有嘅食物，花生鳳爪蚊得好淋，而生腸鵝腸浸過滷水汁好入味又爽口。蠔餅果然令我喜歡而牙帶魚又好好味，下次必定再叫呢兩味。