松澗西日料理 (Closed)

臨近歲晚，同同事喺街諗緊lunch食乜好，咁啱有個姐姐派單，原來豐利中心新開咗間餐廳，咁就一致決定上去試試佢。同事叫咗個汁燒牛柳糖心蛋便當，盛惠$78，小弟就冇份食，但同事就話啲牛燒得夠入味又淋，好好食喎，等小弟下次就試下。我自己就叫咗個蒜油海蜆意大利麵，再加2件忌廉蟹肉薯餅，個意粉好好食呀，好香蒜油味，意粉軟硬度又啱啱好，$48都好抵下。加$12加咗2件忌廉蟹肉薯餅，又幾好食喎，啱啱炸起，卜卜脆，入面又夠味，正！好彩咁啱收到姐姐派傳單先知開咗間好嘢，以後觀塘開飯又多個選擇。