爆丼屋 (Moved) New Location

爆丼屋一開嘅時候已經好想試，但見要等幾個鐘就打消咗念頭。今日經過見唔算多人，拎咗飛再周圍行下，約一個鐘頭就有位。三文魚火山盛丼($128)刺身同飯嘅份量超多，同店名一樣真係爆丼，一個女仔正常食量係絶對食唔哂。三文魚幾厚身，中間座拖羅蓉火山，以赤身、甜蝦、劍魚腩、帆立貝、紋甲魷魚及三文魚籽撈成，十分足料，但拖羅蓉味道較淡，相比之下，白飯撈三文魚同三文魚籽味道更鮮。仲有兩塊紫菜比你撈黎食。三色海膽盛丼($238）都幾失望，除咗量多之外，味道好一般。三種海膽包括北海道馬糞海膽、加拿大海膽同韓國紫海膽。其中一種海膽比較鮮味，其餘兩種基本上只係感覺到食緊一團滑潺潺嘅野，實在名過於實。總結黎講，排一個鐘還可以，但以呢個質素等兩三個鐘實在唔太值得，除非你無咩特別野做。