Little Tipsy Restaurant & Bar (Closed)

住觀塘既好處就係美食多籮籮，而且通常要捐窿捐罅先有驚喜。話說有日阿媽去平時去開嗰間匯豐，發現樓上竟然有間西餐廳。今晚就應阿媽要求，去呢間西餐廳食個晚餐。上到嚟，裝修幾靚，有個酒吧。呢度夜晚冇set，要散叫。我哋叫咗一個前菜，一個主菜，一個伴菜，同埋一個甜品。焗北海道帶子配蟹肉（$108）非常唔錯呀，帶子大大粒又夠彈牙，配左菠菜加蟹肉，味道有所提升。雜菜沙律（$58）有火箭菜、羅馬菜、番茄仔等等，無點加沙律醬，係健康既！美國牛柳配澳洲龍蝦（$298）牛柳係超好食，肉質鮮嫩多汁，5成熟左右，容易咬，牛味各樣都保持得好好。龍蝦相比下就失色喇，肉質唔係好彈牙，亦唔算多肉。朱古力心太軟伴雪糕（$68）心太軟係熱既關係，所以上面球雪糕黎到已經溶緊，一叉個心太軟，反而係雪糕流落黎先，心太軟入面就反而比較乾身，不過互補作用，最後效果都唔錯啦。甜度適中，加上粒粒紅梅，作為一餐既終結。呢度星期六晚都幾熱鬧既，加上播住啲up beat流行音樂，朋友聚會可以放肆傾到興高采烈，都唔怕比人話！