Stay With Cafe (Moved) New Location

將軍澳這幾年已經不再是美食沙漠，多咗好多新餐廳，所以每天午餐都有選擇困難症。今日趁天氣好去海邊行吓，見到這間 stay with cafe 裝修幾靚幾舒服，決定入去試吓。這邊的餐廳大多數是寵物友善，見到有不少人帶着可愛的毛孩去吃飯打卡，好羨慕。一入餐廳見到女侍應同狗仔玩緊，佢無乜心機招呼我，要自己到 counter 落單和斟水飲。我揀咗午市套餐的香辣蒜片青口珍珠帶子意粉，意粉都算 Al denté，香辣味夠但比較乾身，青口和帶子份量都足夠，雖然唔算好鮮味。咖啡可以轉 flat white，味道 ok 拉花都算靚。最喜歡是日甜品，蜂蜜蛋糕表面有少少脆，再淋上蜂蜜，甜甜地好味道，唔知係咪 café 自家製。成個午餐總共$128，不用加一服務費，以海邊餐廳來說價位算平，食物質素都算合格。不過今次用餐體驗麻麻哋，因為餐廳職員全部都好冷漠，淨係同狗仔玩而漠視客人，下次都係試吓其他餐廳，唔想貼錢買難受。