SENSU (Closed)

呢間餐廳係12月期間用優惠碼book 晚市可以有半價優惠，大家記住留意番時間啦，有啲日子就唔用得優惠。見到有呢個推廣，加上餐廳嘅嘢食賣相都幾有心思，決定過嚟試一試。蟹肉咖喱烏冬（配溫泉蛋）$138呢個咖喱烏冬好creamy，都食到幾多蟹肉，加上有粒溫泉蛋，撈完之後啲烏冬好掛汁，好好味。Snack combo $198呢個有總共九款小食，我就認為中間嗰個炸蛋最好食。仲有和牛漢堡細細件，但係牛味好重好好味。壽司同海膽玉子就一般啦。白芝麻醬炸雞盛合 $138呢個估唔到個份量竟然有咁多，除咗炸雞仲有相當多嘅配菜。呢個價錢來講可以話都幾抵食，不過就始終覺得而家冬天食嘅話，配菜多數都係沙律或者凍食嘅配菜。呢間餐廳嘅嘢食都幾有心思，由佢嘅擺盆睇得出佢每一份食物都幾精緻。價錢其實都相當合理，因為份量都幾多，加上環境都坐得幾舒服。同埋千祈唔好睇小佢嘅份量，以為每一樣嘢只係一啖但係食下食下真係超級超級飽。加上今次去食有半價優惠，以呢個質素同埋環境真係無敵抵食。