芝味鳥

Open Now

Now Closed

屋企人叫咗Pizza Bird外賣，佢哋前身係Pizza and Chicken，近年先改名做Pizza Bird。落單後約個半小時先送到，不過當日係繁忙日子，都可以理解。芝味B餐，海洋風情大批一個、香草烤雞螺絲粉一客、炸雞三件、汽水三罐。海洋風情大批餡料係魷魚、蝦、蜆仔、蟹柳、洋蔥、青椒、菠蘿、芝士同千島醬，種類雖多，份量就幾少，零星咁分散晌薄餅表面，千島醬食味偏甜，唔同坊間甜中帶酸嘅味道。香草烤雞螺絲粉，記得早年仲係叫Pizza and Chicken嗰陣食到嘅醬汁係滿滿香草味，可惜呢次食味稍淡，就似一般茶餐廳頹式白汁，螺絲粉亦較腍身。炸雞方面，色澤頗深，似乎炸得過火咗，表層炸漿亦唔薄，食落肉質乾身，比仍係Pizza and Chicken初期失色好多，但就比K字頭炸雞店算係好啲啲，至少食得出調過味同仲係熱辣辣嘅。另外跟餐可以揀汽水、餐湯或蒜蓉包，落單嗰陣話要汽水，一般餐廳都會俾百事可樂（或可口可樂），但當日佢哋隨機俾咗7up同Mirinda青蘋果味，所以落單時真係要講明想要咩口味嘅汽水，以免出現唔啱飲嘅情況。