Video
Read full review
2011-03-13
54 views
一直都好想拜會一下嘅龍鳳廚坊，機緣巧合下竟在一星期內到訪兩次，兩次飯局都係跟我最好的朋友分享，所以希望在小弟美食Blog出世的日子，特此優先寫下呢個食評，作為多謝佢地對我一直嘅支持。位於太子嘅龍鳳廚坊雖以潮洲菜為主打，不過風格跟傳統迴異，部份招牌菜式更加係在其他潮洲菜館聞所未聞。首次到來未知餐館底蘊，所以都係叫招牌菜式最穩陣。先來頭盤青瓜脆腸，雪白色嘅生腸咬落去爽脆非常，滑不溜口，配上香濃麻油及酸醋，非常醒胃，加埋蔥花襯托下，呢個頭盤絕對無敵。頭盤過後再來一個暖暖嘅青欖白肺湯，呢度嘅燉湯係需要預訂，一盅約可以分到八碗，大家訂位時可以先預計一下。侍應為我地分湯後，將湯渣放上碟上，大大堆豬肺雞腳，用料豐富，未食已叫人流晒口水。青欖白肺湯火候十足，清甜無比，個人覺得比起杏汁白肺湯更勝一籌。豬肺軟腍嫩滑，雞腳肉厚滑溜，再蘸醬油食，實在好味到不得了。碌鵝果然係名不虛傳嘅招牌菜，據知所謂碌鵝，就係將醃料塞入鵝肚，放於溫油上慢慢碌熟，然後將鵝肚內醬汁曬上鵝身，再不停翻動，碌到入晒味為止，相當花時間功夫。肥美鵝肉吸盡醬汁精華，微脆鵝皮夾雜豐富肉汁，非常好味！而鵝肉雖有半厘米嘅肥脂，但勝在入口即溶，加埋
位於太子嘅龍鳳廚坊雖以潮洲菜為主打，不過風格跟傳統迴異，部份招牌菜式更加係在其他潮洲菜館聞所未聞。首次到來未知餐館底蘊，所以都係叫招牌菜式最穩陣。
先來頭盤青瓜脆腸，雪白色嘅生腸咬落去爽脆非常，滑不溜口，配上香濃麻油及酸醋，非常醒胃，加埋蔥花襯托下，呢個頭盤絕對無敵。
頭盤過後再來一個暖暖嘅青欖白肺湯，呢度嘅燉湯係需要預訂，一盅約可以分到八碗，大家訂位時可以先預計一下。侍應為我地分湯後，將湯渣放上碟上，大大堆豬肺雞腳，用料豐富，未食已叫人流晒口水。青欖白肺湯火候十足，清甜無比，個人覺得比起杏汁白肺湯更勝一籌。豬肺軟腍嫩滑，雞腳肉厚滑溜，再蘸醬油食，實在好味到不得了。
碌鵝果然係名不虛傳嘅招牌菜，據知所謂碌鵝，就係將醃料塞入鵝肚，放於溫油上慢慢碌熟，然後將鵝肚內醬汁曬上鵝身，再不停翻動，碌到入晒味為止，相當花時間功夫。肥美鵝肉吸盡醬汁精華，微脆鵝皮夾雜豐富肉汁，非常好味！而鵝肉雖有半厘米嘅肥脂，但勝在入口即溶，加埋碟底有酸蘿蔔俾大家中和一下，怕肥膩感覺嘅朋友亦唔駛太擔心！
女士們或者對碌鵝又愛又恨，但北菇花膠鵝掌煲就應該唔會抗拒。鵝掌色澤亮啡，鮮味突出，而且夾起上黎唔會咁易甩皮甩骨，應該係走油功夫做得好所致。花膠由於含有大量骨膠原，所以燜煮太耐一定會融化，但呢份花膠做得彈牙爽口，而且已將濃湯汁液盡收其內，精彩好味，加埋用熱辣辣嘅煲仔上檯，未食就先興奮啦！
賽香肉同樣係龍鳳廚坊名物，香肉即狗肉也，但賽香肉就係仿傚做狗肉嘅方法，用豬腳裝假狗，再以九層塔、胡椒、花椒、八角等香料去煮，香味十足，豬腳彈牙入味，用黎佐酒好適合，熱辣辣放入口，極惹味！
潮洲菜中煎烙都幾受香港人歡迎，而呢度款式亦算多，但今次唔打算食常見嘅水瓜烙同埋芋頭烙，改叫茄子烙。茄子必成條狀混入漿粉煎香，食落酥脆香口，感覺有如蠔餅跟薯條混合體，入口雖有少少油膩感覺，但水準方面絕對係無庸置疑。
食中餐總要有飯到肚先安樂，見餐牌有荷葉飯及糯米飯供應，由於糯米飯相對黎講好多地方都有得食，所以選擇前者。好食嘅荷葉飯一定要有荷葉清香先合格，飯一上檯，陣陣香氣即時傳來，當打開見到飯粒時，濃濃香味令人失去理性，急不及待要分一杯羹。荷葉飯配料好豐富，冬菇粒瘦肉蝦肉蛋花樣樣齊，飯粒咬落充滿蠔油同荷香，非常精彩！龍鳳廚坊無華麗裝修，亦無笑容親切嘅侍應，單憑食物水準已成功俘虜我，而且價錢只係大排檔價錢，又有冷氣俾你嘆，絕對啱晒一大班嘩鬼朋友聚舊。不過提提大家佢地無做午市，六點先開門，所以訂檯都要夜晚先可以打黎！
Post
