Mr. Korea BBQ (Moved) New Location

星期五想食韓燒，搵到呢間見有好多人讚，心諗應該唔會中伏，去到門口要上樓覺得個地方有陣味，較嘈，未有韓國人招呼。啲位係背對背坐，啲抽油煙機好似未能發揮功效，餐廳內仍聞到啲燒煙味好大。我地叫咗豬肉拼盤$300幾蚊、一碟牛肉$200幾蚊、一個芝士帶子，入面有4粒$100幾蚊，一罐coke zero，合共$862蚊。如果比較韓國街啲韓國人開嘅店，咁上下嘅價錢嘅舖都係較為整齊企理，食物質素亦好。呢度成碟豬肉只有醃過嘅豬肉係最好食，其他豬頸肉及豬腩肉連牛肉係冇味。芝士帶子係用個錫紙算裝住，上面加咗芝士及蒜，好鍾意食芝士嘅我覺得冇芝士味，非常失望。埋單時開錯單$1,780，我得兩個人食到千幾蚊？所以再提醒收銀處再查一下，應該係$862蚊先岩。因為舖頭唔夠韓燒爐，所以有部分用平時屋企BBQ啲爐，我地坐近廁所位，坐得唔舒服。整體嚟講，我唔建議鍾意食正宗韓燒嘅你會去試。