金滿軒 (Closed)

同事介紹下午茶ok, 於是去試吓, 入到去未坐低已經係咁問你飲咩茶, 因為自己唔係好飲得濃茶, 問阿姐可唔可以唔開, 點知話就算唔飲都照收茶錢, 唯有照開, 但全程只飲了兩杯。跟住我要了菜肉雲吞麵及高力豆沙, 麵的賣相唔差但一食, d麵都幾硬, 可能師傅唔想淥太耐變漿糊, 呢樣都可以接受, 但d麵同d湯都係冇味, 想搵d醋, 點知呢樣食上海菜必備嘅調味料都欠奉, 問阿姐就只倒一碟仔俾你囉! 再食粒菜肉雲吞, 但只得兩片菜碎, 我仲以為自己食緊嘅係"全"肉雲吞添, 真係經典! 到食高力豆沙, 又係嗰樣唔差, 但一咬開, 又出事! 雖然唔係成日食上海菜但印象中高力豆沙d外皮應該好薄吓, 軟綿綿先係, 但我覺得而家好似食麵包咁, 好厚但得好少豆沙, 完全唔係嗰回事。 唉, 到最後想埋單, 望極都唔見有侍應, 原來企係到一齊玩電話, ok, 咁自己行出去找數, 點知連收銀都係攞住個手提傾電話仲要未講我張單幾多錢就係咁伸隻手出黎要收錢, 阿姐, 唔該尊重吓你d顧客啦, 慌死人地唔俾錢咁。總之一句講哂, 冇下次!