What The Food Cafe (Closed)

藍妹提過幾鐘意食蛋包飯，同事推介我食粉嶺既呢間蛋包飯。粉嶺近近地竟然有間蛋包飯未試過，當然要狗衝去啦。😁果到9點就關，好早就last order，所以想去要自己留意時間。即使住附近，但果到真係幾格攝，冇車其實幾難去到。😂—「WTF」，「What The Food Cafe」，幾鐘意佢呢個玩字既Gimmick。Menu好有趣，用圖好得意，仔細睇下佢啲菜式名，幾搞笑嫁。😆—杯都係自己既Logo，加分。—招牌蒲燒鰻魚超級滑蛋包飯個賣相唔錯啵，鰻魚唔係食過最大條既，不過都算OK，厚身既，不過好似特別多細骨。😣蛋包飯最緊要既一定係滑蛋，呢個滑蛋好正，非常滑！蛋味突出，佢加左少少甜豉油，甜甜地更正。🤤男朋友好欣賞佢既飯唔係白飯，佢係炒飯，而且落左麻油，超級香。😍—無敵拿破崙一世香腸長通粉平時多數食卡邦尼，好少食拿破崙，藍妹發現都係鐘意食蕃茄既拿破崙多啲，酸酸地非常開胃。😆炒得幾乾身，不過長通粉每條依然掛住左啲汁。男朋友話通常拿破崙都會用辣肉腸呢啲比較重味既腸，但呢間只係用普通腸仔，實在失色。😞—兩個人食個晚餐，都唔算貴既。蛋包飯係值既，但係拿破崙就差左少少啦。