天奴豬扒餐廳 (Closed)

試完「成記茶寮」同「開心小叙」，第三間就係「天奴」！呢到既豬扒主打係用人手逐塊搥鬆，之後再用香茅同其他調味料調味再煎，令我都幾期待，睇下會唔會媲美到「成記」先！餐廳外面內部同樣係茶記，有外面有裡面，相比起另外兩間坐位就少左啲，好彩當日外面仲有位就住左係出面。食物選擇呢到就真係唔係只有豬扒，「開心小叙」都有一張MENU專食豬扒，但呢到冇，同普通茶餐廳一樣，以豬扒做主角既款式唔會特別多，都係正常茶記款式。香茅豬扒蛋飯  $51可以揀跟飯/薯菜/意粉/沙律，而醬汁方面係最多選擇既一間，有成7種，分別係粟米汁、蒜茸汁、洋蔥汁、黑椒汁、咖哩汁、鮮茄汁、豉油汁。同樣地都係揀返豉油汁，呢到同其他兩間有個最大既分別就係呢到有一條長矮瓜，可能係因為想碟飯有啲菜既關係而加入去，不過對豬扒飯黎講，我就覺得有啲格格不入，我會寧願無左條矮瓜收返平少少個價。講返味道，豬扒都係屬於厚身，有香茅味，仲會見到有啲辣油漿住左係豬扒面，食落有微微辣油香但又唔辣，鬆軟度夠，不過冇乜肥膏，加上豉油汁又係太少，同埋價錢稍貴，相比之下，供然係「成記」勝出～總括黎講，呢間既豬扒厚度、口感其實同「成記」相約，不過成記更鬆化同帶多啲肥膏