點知早幾日有個朋友搵為食貓，話佢間「本地」芝士撻舖開張，叫我去試下。注明本地，皆因成個Recipe都係老細同Team一齊度出來，並唔係買日本品牌嘅。舖頭叫「芝士工坊」，都幾多嘢賣，而重點係每樣出品都同芝士有關。呢個朋友都算厲害，咁都畀佢諗到。問返佢，佢話其實佢可以開一間「朱古力工坊」、「乜乜工坊」，但考慮到舖頭所在區域，佢覺得都係開「芝士工坊」會較為受歡迎，皆因芝士可以甜可以咸，產品豐富啲、客路又多啲咁話。
隱藏住宅區嘅芝士舖
其實如果唔係為食貓中意周圍走，都未必一嘢就知間舖喺邊。舖頭就係馬場對面，南新花園中間個休憩區嗰度；個招牌有塊黃色芝士，都幾搶眼。你以為入到舖會聞到一陣芝士甜味？少年，你太年輕了。老細設計到餅房同舖頭分隔得好清楚，所以原材料味道唔會飄到出嚟。而且產品暫時未需要用到Blue Cheese，所以陣味真係唔會好勁。
睇咗幾個月為食貓我啲文，你都知我中意麵包，所以一入去就畀麵包吸引住。暫時有三款（各$12）：藍莓芝士包、芝士腸仔包、芝腿包，老細話上咗軌道就會再出多啲款。
黃金比例芝士撻
眼光再掃過去，就會見到食糊產品：芝士撻。老實講，從外表上睇，同之前你哋去香港追嗰啲無乜分別。不過咁，蛋撻都係個個一樣樣㗎啦，唔係你想點啫？
所以我即刻擺個入口，芝士軟綿綿，味道清清哋、唔嗆喉，都幾好。撻皮就要硬少少，咁先頂得住入面啲芝士。為食貓仲請朋友試過，佢哋都好鍾意。老細話一個撻有三種芝士，仲要試咗好多次先有呢個黃金比例；而且每個撻由皮到餡都係全人手製作。咁有誠意都係$16一個，OK啦！
芝士工坊仲有Cheese cake同泡芙賣，加上個撻放雪櫃就可以生存到兩、三日，所以得閒就嚟買幾個食啦，澳門有幾大啫？
文：Hungry Cat
編輯：macau@openrice.com
隨時接收最新資訊
讚好OpenRice專頁！
Keyword
芝士包
芝士撻
Copied to Clipboard