祥記麵家

Open Now

Now Closed

今年新年去澳門兩日一夜去Studio city玩同住一晚。第二日中午想揾local 嘢食，所以來呢度食個竹昇麵。 今次第二次來了。我地點咗招牌蝦子撈麵，豬手麵同炸雲吞，加兩支大可樂。 豬手麵- 個舊豬手size 比較細，咬落口感比較多筋，豬手塊皮有點硬唔夠腍，唔係我最鐘意食嗰啲又腍又滑嘅豬手皮。成舊嘢食落去似食啲爽筋多過似豬手，而且唔係太入味，失望。好在仲有靚麵底，唔係扣哂分。 蝦子撈麵-果然招牌！本來我無諗住食，驚會太鹹。點知我見Mr A 撈起時聞到陣陣蝦香味，佢個樣又食到津津有味咁，我就試食咗一啖。噢！啲麵當然都係爽又彈牙，撈起啲薑蔥加蝦子嘅鮮鹹香超好味，完全無我之前擔心過鹹嘅問題，味道鮮鹹度perfect! 唯一要彈嘅係太細碟。所以我地又encore咗 一碟！ 炸雲吞- 諗住叫個小食送下麵，點知咁鬼好味！ 個皮超級鬆化呀！唔似啲酒家點心炸到硬脆嗰種，入口鬆化感係好有層次的。雖然入面嘅蝦細細地，但都算OK彈牙。下次再來澳門我會再來食返呢個炸雲吞

9月5日, 走出營地街市, 再出發去福隆新街食午餐~ 又係蔡生推介最好食嘅蝦子麵, 外面大排長龍, 裏面水洩不通! 當真咁好食? ::: 蝦子麵 ::: $19一粒粒蝦子顯而易見, 真係用料豐富~ 咬落味道十足, 少少鹹味, 蝦子可在齒間徘徊~ 另外麵條好香蛋味, 彈牙爽口, 撈埋底下d豉油雖然簡單, 但味道調較剛好~ 不過好細碟呀… 細食人都可能嫌唔夠食!::: 炸雲吞 ::: $28用料亦係十分豐富, 有12粒之多, 每一粒炸雲吞都食到原隻蝦喺裏面架! 雲吞皮炸到認真金黃色, 香脆十足~ 入面隻蝦係超彈牙!! 點嘅醋都幾特別, 少少酸吊起胃口, 作為餐前小食嘅話真係無得比~ 唯一差少少嘅係油多咗d…十分出色嘅蝦子麵, 果然冇黎錯, 食完終於都有少少飽, 遊一下景點先~