北京水餃

Open Now

Now Closed

响氹仔食咗咁多日，是晚終於有機會過番去澳門嗰邊食嘢，順便辦一點私事。沿住新馬路一直向北走，馬路兩邊有關食嘅都係賣手信嘅舖頭，要發掘好嘢食，就要落足眼力望一望內街，同埋要觀察當地人嘅一舉一動。如是者我由新馬路噴水池行咗大約五分鐘，响對面馬路嘅內街望到一間大大隻字寫住「北京水餃」嘅舖頭，外面仲企咗唔少人。我心諗呢間嘢一定有其過人之處。 呢間舖頭打正旗號，就係一個「平」字，賣嘅係北京小吃同麵食。要形容有幾平，只要講吓啲價錢就一清二楚：水餃一打十二蚊；煎鍋貼半打十蚊；套餐(包括一碗湯、五隻韮菜豬肉餃、一碗雞絲麻醬麵)九蚊；豆漿兩蚊等。舖頭入面有一個牌匾，道出老闆嘅背景同埋經營呢間舖頭嘅理念。講番食物方面，麵條唔夠口感，偏向淋，不過撈埋麻醬(其實係花生醬)，配合少少嘅雞絲，還算可口；餃子大小一般，唔會因為價錢嘅關係而變細。餡料有好重嘅韮菜香味，豬肉就較少，點了些醋亦不錯。餃子皮偏厚，但唔會好似「小南閣」咁有硬嘅感覺，厚度與蒸嘅火喉配合剛剛好。有機會一定會再嚟試吓其他食物。要食平嘢，有陣時就要忍受一下環境。這裡地方淺窄，坐得唔係話好舒服。不過，食物價錢同埋質素足以彌補呢方面嘅不足。

呢間喺新馬路嘅北京水餃已經成為我嘅心頭好！雖然去過北京，但係就未食過咁出色，咁令人一試難忘嘅餃子! 佢啲水餃有分為蒸、一面煎同埋兩面煎三種，最少可以叫半打，餡料有韮菜豬肉同埋白菜豬肉兩種。我呢次就叫咗一打白菜豬肉一面煎嘞！啲水餃嚟到熱辣辣，一啖咬落去，噢！肉汁豐富到爆汁添呀！ 塊皮好薄，啲肉餡真係好正，又夠香口，好好味，密密食，一個人不知不覺間就可以好容易解決咗一打水餃！不過值得一提嘅係舖頭環境非常擠迫，你一定坐唔耐，不過要食好嘢梗係要付出代價嘅，我就一啲都唔介意嘞，因為多人嚟，佢生意好即係仲有得做啦！咁我就可以繼續食到佢啲水餃嘞！而家要搵到啲咁細規模，出品又咁有誠意嘅小食店真係要靠吓運氣先得嘞！

店子細，只有3-4張檯，環境尚算衛生。食物不算多選擇，但味道是值得一試的。點了一個餐，黑椒牛肉麵，豬骨湯，白菜水餃5隻，埋單MOP14黑椒汁拌了芽菜，牛肉不多，只得三四塊，但問心，這個價錢你想要幾多呢！？麵條會幾飽肚。味道一般，黑椒汁不夠多，應可向店員加，不過見他們忙所以算了。豬骨湯一小碗，但不錯，因為水餃和麵都有水份，所以覺得份量恰到好處。我不吃韮菜，所以轉了白菜豬肉水餃，美道出奇地好，鮮甜多汁。雖然不算是名菜，但我保證大家會吃得開心滿足，因為價錢實在大眾化。本想試試鍋貼，但我只有一人，店員說最少要叫半打，所以沒試。另外我見鄰座兩位澳門師奶點了隻xxx雞，菜單上標價也不貴（數十元），看她們吃得津津有味，相信不俗吧！大家有機會也多去不同餐館試試，發掘更多隱形好店子！

可能, 它沒餃餃震充滿多元化的餃子,但它是正宗的. 店就只有白菜, 九菜餃和鍋貼.價錢平, 又大份. 時至今日, 兩個人去食到肚飽也是四五十蚊度...去邊度搵?不過地方比較舊, 也較傳統....