楊六記 (Closed)

原本想找兆記,但原來一早收左檔,無意撞左入呢間, 食後上openirce才知原來是寶粥痴的男友很滿意,但最中意這種隱世小店其實這樣吃粥真幾有風味,這才是旅行的意義非常簡陋,隱秘, 在小巷中吸引男友的是邵地踎的隔局,吸引我的是老老板認真的樣子由於去時並不知它的招牌菜,以為它只有粥只叫了一碗牛什粥, 才13元粥底很稀,但出奇地有米香,蔥香牛什的顏色淡淡的,卻很入味,食得出香料的味道和牛本身的香牛筋嫩嫩的,有點點的牛脂味, 可能因為是粥的關係,牛什細細碎碎的下次要來試試單點牛什openrice的人真識食,想不到已經那麼多食評

apr 23, 10,終於可以食到啦,5人共叫咗 :1) 草肚+牛蹄 (mop10) -有溫和嘅牛燥味,調味不過鹹但夠味-草肚好入味,又腍-原來牛蹄入口滿是膠質,炆到腍晒-所以食完呢碗之後,我又去買多碗2) 牛什 (mop10) -因為去到時間已晚 (>5.30pm),所以餘下嘅位置唔多,想食嘅牛頭皮,沙瓜都賣晒-咁就叫個什,咩都有少少咁啦-呢度有牛氣管,肺,膀............* 之前好多次嚟澳門,都有不同嘅原因,所以食唔到,今次終於趕得切嚟食* 澳門有好幾檔牛什好出名,但呢度嘅牛什嘅味道唔同,佢嘅汁唔會好濃/惹味,只喺溫溫的,但就覺得佢個汁都味道豐富,好似用咗好多材料去整,而牛什亦有牛燥味

只係叫咗碗牛什粥... 好重味精...要飲好多好多水...真係唔知有咩咁好食...抱歉...唔識欣賞...無下次, 都唔會介紹朋友去...

之前我都想過去食楊六記，不過真係好難搵。 今次同朋友慢慢行，結果比佢搵到楊六記先。唔熟路既食家，可以由大三巴街行去草堆街，經過大街既垃圾站再沿草堆街步行，望向左手面第一條橫巷最篤就係楊六記所在。我地行到入去楊六記，舖頭散檯坐滿晒街坊客人，只有巷仔車仔檔前面有2個位。我同朋友於是坐喺車仔檔前面睇佢煲牛什有咩料，楊六記口中就不停介紹牛內臟。我係保守既人，楊六記徙咁多口水，去到尾我都淨係叫咗碗牛肚。牛肚--炆得唔夠腍，有啲黐牙根，佢個鹵水汁比香港食開既淡，但牛味濃郁。臨走既時候，楊六記仲展示牛鞭的長度，待客十分熱情。

見到咁多人介紹 wor~當然要去試試啦!!!原來真係好難搵架~問左 3、4個人先搵到,去到剛剛見到有個外國人,佢正奇怪果 d 係咩黎..... 我地呢 d "搞事" 份子,絕對唔介意介紹佢知啦~佢知道之後, 唔洗 5 分鐘就走人啦~可能佢覺得好古怪啦~不過楊六記真係好犀利架~你講得出既, 未食過既, 佢都有得食~!~!~!牛鞭、牛波子、牛指甲、牛蹄等等等.....佢個 "魯" 水汁唔係好濃, 不過都幾香,d 料o岩o岩好入哂味! 正~

見寫開澳門的食評,順便將這個埋藏了一年的食評,重新出土.當大家在Robuchon享受一頓三小時的午餐之後,再在噴水池附近會合其他朋友,帶大家去到爛鬼樓內的橫巷,吃牛雜.剛好吃罷米芝蓮三星法國菜,下一站坐後巷吃牛雜,有點一念天堂,一念地獄的強烈對比.這個檔口的牛雜種類,多到令人乍舌,有牛鞭牛睾丸之外,更有一些大家想也想不到的牛部位,有牛眼,牛頭皮,牛腳甲,牛喉等等,在香港最多吃牛鞭,這些部位一定找不到.大多人聽到個心都發毛.楊六記每天只開四小時,由兩點至六點的"都市閒情"師奶時間,是日沒有運,很多部位也沒有,結果,要一碗牛鞭.牛鞭又爽又彈牙,充滿著骨膠原,膠質極為豐富.用來熬牛雜的湯底,才是最終極的精華,所有牛的精髓,全部在湯裏面,超濃縮的牛湯味道極之濃甜,,又是啖啖骨膠原.吃罷整碗牛雜之後,記得不要浪費碗湯.尤其是女仕們,就算對牛雜有所害怕,也不要拒絕喝這碗牛湯.今次澳門行吃不到楊六記,是小小的遺憾.寄望下一次,再次闖進爛鬼樓後巷,用亂棍打死牛魔王.

有人在食評中大讚此乃澳門牛雜第一，極渴望親身一試。帶着十多人沿草堆街找，最後還是要問街坊才找到，原來他位處橫巷的深處，在大街是見不到的。環境比想像中差，但最重要是好味遮，其它乜都唔緊要。但心中隱隱覺得不對勁，牛雜唔係應該好香咩？點解聞唔到香味呢？叫了三碗二十蚊的，跟香港吃慣的很不同，味道比香港的清；所選牛什的部位也很有分別，軟骨和一些看不出是甚麽的東西也拿來奉客，有些軟骨甚至是非常硬，殊不欣賞。我不能說這碗是垃圾，但是一碗没有香味沒有靈魂的牛內臟。自已碰釘子怪不得他人，最慘是對不起朋友要跟我走那麽長的冤枉路，其中一位還有腳傷呢。

澳門街的小巷眾多，地圖上沒有清楚的指示，要找楊六牛什粥，只好靠女友帶路，幸巷仔口有一指示牌，終於在六點前趕及吃馳名的牛什了。楊六牛什粥，重點其實不止是牛什，還有粥品，老闆表示每日開下午兩點至六點，但粥底一賣光就會收工，保證日日清。點了一碗細什 (MOP 10)，沒有指明要何部位，但見大盆內的確應有盡有，肚、腸、鞭、蹄、肺、膀、氣管、睪丸等，的確令我眼界大開。牛什著重汁香味濃，楊六的出品的確十分出色，也藉機試了一些「特別」部位。先是牛天梯，即是牛的氣管部份，跟豬天梯口感相若，彎彎的一小條，入口十分爽脆，蠻有好感。其後是牛蹄，即牛腳踭，質感充滿骨膠原，有點像平價版的海參，可以說是女仕們的恩物。最後的是牛睪丸，放心，沒可能成粒啪，因為一粒足足有半個人頭咁大，老闆仲拿出一大盤牛睪丸給我拍照，據佢形容，入口有點似食蛋黃，沒什麼可怕的。的確是有點噁心，但那時也不能理會太多，快快手放入口，牛睪丸的質感有點粉，沒有傳出任何異味，是可以接受的，但味道又不見得討好，夠膽的不妨一試。巷仔衛生始終麻麻，同場亦有好多阿叔爆粗吹水，環境方面要扣點分數。吃罷，行出大三巴，沿途遇到街邊無名羊腩煲，不禁口水流，但怕吃完

隱世牛雜粥，牛雜好新鮮，好軟腍，粥好清甜，十個好味!!!!!!雖然食的地方好簡陋，但老闆好好人，又熱情又健談，好NICE。都是那句：食物OK最重要，環境永遠是次要!!

澳門之行差不多到達尾聲，胃口已是強弩之末，到這裡兩人隻想淺嘗一碗牛什。天氣炎熱，幸好原來也有室內位置，無空調，但也有大風扇。阿叔見我們第一次來，頗風趣地介紹了各樣可選的牛部位，我們最后叫阿叔什麼都剪一點算了，典型貪心的為食鬼。牛什的湯很不錯，濃得來不致搶味。如圖所見，確是什麼部位也有，其中牛肺挑了硬的管道，讓人食得舒服之余，口感更佳，可見心思。其他部位也不錯，但不詳談了。食了男人補身的東西，這樣的天氣下，熱上加熱。

我每次去澳門定必食楊六記的牛雜 哈哈哈!!都無咩可以再讚，只可以講 "好好食"。在香港，真係食唔到這種味道。

見KC o既食評，來澳門係應該搵o下牛雜食，好，就咁話前晚打大風，最擔心o既就係唔知食唔食到楊六由保健o個邊行過o黎，真係幾難搵，街名好近，但硬係方向唔太清楚路在口邊，兼搵到石仔路就係重點好彩有開佢的確係比預想中o既簡陋更簡陋 二話不說，自是牛雜。大$20，細$10，要了各一，純粹一試，可惜沒有頭皮甚麼的來，看看有甚麼，唔識……哈哈。因為同香港食到o既組合都幾唔同，呢度無牛膀，有肚、腸、根、一o的有軟骨o既唔知咩，等等。味道同香港o既好唔同，因為往往香港o的牛雜係會食到o的苦味咁。每一件都好爽口，有鮮味，令我覺得牛雜唔係話係個煲度燘好耐就掂很出色，香港似乎真的找不到

街外既牛雜檔同楊六記既原全冇得比!出面既,最多都只係得肚,肺,潤等等既野.而楊六記先識得將牛既所有精髓體現出黎!而且仲唔會有so味. 只可惜最近水準似乎有d下降,味道偏淡...但係我會繼續用期待既心情,去食你美味既內臟!!

好好味又好乾淨 老板又好健談 好好人 我問佢有冇牛眼 佢話冇左好耐 因為攞唔到 好多寶都俾人丟晒 (一副唏噓的模樣) 基本上你想要乜老板都會盡量滿足你的要求 真係唔錯....原來牛雜都係老板娘整的 好有屋企味道 整得好企理 一D"so" 味都冇 亦唔會好重味精 好似係屋企食咁放心

三月初一‧有雨作為一個牛雜愛好者，來澳門一定開心，因為這邊的牛雜水準甚高。在香港，我們只有13座牛雜，在澳門，周街都比這邊的好。在澳門街的好幾檔牛雜中，我認為水準最高就是這裡，除了勝在味道，還有那琳瑯滿目的牛雜種類，沒有其他地方可以媲美。在洪馨那邊吃完點甜食，就拉隊過這邊，五分鐘便到。只見楊六還是老樣子，問問有什麼好吃，楊先生說了一大輪，真的是數得出的部位也可以找到。朋友非常高興，大家就像上生物課的，想吃什麼就說什麼，大家也吃到心頭好。我吃的比較簡單，只是牛頭皮及牛肺，加幾件牛腸就可以了。牛頭皮膠質豐富，口感非常豐腴，充滿著骨膠原，那用買幾百元的護膚品？吃多幾件便行。牛肺軟熟，清理得很好，沒有異味。而這裡的鹵水鮮香，牛肺吃起來自然美味；牛腸是牛小腸的部份，很多朋友也喜歡吃「肥腸」，我卻認為適可而止就好，已夠美味；吃完，見大家也還在「戰鬥」，去拮一粒牛眼吃，一樂也。埋單17蚊，這才是真正的吃牛雜！人家來澳門吃什麼豬扒包或葡撻，我來這邊，不吃牛雜不行。