牛記咖喱美食

Open Now

Now Closed

上次去牛記係3年前, 澳門嗰間! 不過今次係氹仔遊, 好彩牛記喺氹仔都有分店, 唔駛專登過橋! 的士由酒店去到牛記門口, 一般茶餐廳門面, 差 d搵唔到個入口! 食評力推 “蟹黃撈麵”($42) 果然名不虛傳! 一個麵餅, 蟹黃份量算多, 未食聞落好香, 配上大量蔥花及薑絲, 辟去腥味! 撈均後條條麵都掛滿蟹黃, 唔會一口油, 亦唔覺油膩, 令人一食想再食! 呢個份量男人應該唔夠飽! 香煎墨魚餅撈麵 $42 ~ 外脆內彈, 煎得表面金黃香脆, 墨魚餅好厚實好彈牙, 仲好大件! 至於麵尼….因為食完蟹黃麵, 呢個撈麵就顯得較為失色! 咖喱牛腩飯 $39 ~ 落單時老闆娘講到明係 “好辣” 的, well 我食得辣, 唔怕! 咖喱汁好香, 好惹味, 堅辣! 咖喱唔係椰香, 甜味嗰種咖喱, 反而有d 似印度咖喱, 勁多香料煮成黑黑哋色嗰種! 牛腩唔係好淋, 同我哋喺香港平時食炆到淋晒既唔同, 有點咬口, 不過都好入味! 註: 麵質幾好, 食落無梘水味, 軟硬適中, 食完無胃痛!