李康記豆腐花 (Closed)

記得好耐之前有個朋友介紹我試呢間舖頭食豆腐花, 印象中的確係好滑! 佢仲話呢間豆腐花舖既豆腐花係全澳門最滑最好味tim!!所以我同其他人黎親澳門, 點樣都會黎呢度食番碗! 不過今趟就有少少唔同, 自己一心想試多d之前仲未試過既食品, 所以起初冇諗住食喇! 點知男朋友話今次好想再食...咁又黎食喇!舖頭十年如一日冇變過, 有時都覺得澳門有呢度好, 無論新建設與舊景物都可以互不相干地一直並存下去, 相映成趣! 舊有既街道商舖就好似永遠凝結在某一個時光一樣, 要幾時重溫就幾時重溫得到....講真果句, 李康記既豆腐花其實係冇乜豆味既, 如果一心想黎食一碗豆味好濃既豆花就請去別家吧! 但講滑溜程度, 呢度確係一絕!! 其實我相信無論本地人或外來客點解咁多年都咁長情要來吃豆腐花, 當中一定有其原因既! 大概都係鍾意佢既滑溜口感同佢係清甜! 十居其九既食客都會order要加花奶, 冇錯! 加花奶真係更加好味架!! 記得我第一次帶男朋友黎食既時候佢話冇豆味麻麻地, 但今次佢竟然主動話黎食真係有少少意外架, 哈! 佢話因為真係好滑好清好解渴wor! 佢仲一口氣連食兩碗tim, 勁!! 我自己就食一碗喇