新波爾圖 (Closed)

暢遊澳門嘅晚上，行下行下發現已經頗夜，又有少少肚餓，於是決定喺官也街搵嘢食。當時唔係好多鋪頭仲有開，行過見到呢間叫新波爾圖嘅餐廳，門口幾有葡國特色，選擇唔多嘅情況下決定試吓呢間餐廳！見到餐廳有兩枱都有叫呢個檸檬白酒炒蜆，所以我哋都叫來試吓。香港就唔多餐廳會有呢一個菜式，嚟到咁多葡國餐廳嘅地方，一於試試啦！睇落好似唔係好大碟，但其實兩個人完全夠分。白酒煮嘅時候酒精會揮發，剩低嘅味道同檸檬配合就成為呢個汁。首先試試個汁，有淡淡檸檬味幾特別！主角蜆煮得剛好，頗有鮮味。另外仲有一啲生嘅蒜片，加上少少辛辣嘅味道，亦增加口感。另一道菜係香煎三文魚扒伴意大利飯，意大利飯嘅醬係用香草同奶油煮成，食落會有淡淡奶香，但係質感控制得好好，唔太稠，食完個飯都唔會覺得好膩。飯就有少少過熟，但整體幾好味！今次唔係太肚餓所以叫得唔多嘢食，下次一定返嚟再食，期待其他菜式。