南北麵點小廚 (Closed)

獨自爬起身回港，幸運地一出酒店就有的士喇，真好！竟然一對州民男女從後衝前打我尖，離晒譜架！誰知無上車喎，司機表示趕時間交更唔順路，所以唔車佢地啊。抵死呀，心都涼！係我既始終係我既，掙咩啫？最終載我去碼頭，而且司機叔叔仲要好鬼 nice 添喎。到達碼頭見仲有時間，嘆個早餐先上船。麥當奴係左近，梗係唔去啦，好采發現有間南北麵店小廚啫。雖然係商場走廊舖，座位半開放式，檯櫈夠大張，密度不太高，都算坐得舒服。菜牌上面既小炒非常吸引，我勁有興趣呢！不過食早餐乍喎，算吧。好采碼頭有食肆醫肚唔洗捱餓咯，食飽飽滿足地上船返香港。五香牛腩麵走蔥，賣相竟然使我聯想到沙嗲牛肉麵呢！五香醬汁又濃又多，為淡淡湯底增味不少。大大舊鬆化牛腩，不乾不硬不鞋，清純五香汁滲透其中。爽彈生麵掛上五香汁連腩肉，梗係好味啦，預料之外的滿意。小籠包，不是灌湯小籠包，不過豬肉軟綿滑滑，味濃多汁濕潤，皮雖厚但嚥韌，泛出麵粉香。沾上酸醋暢快地一口一粒，開心舒服。