小窩 (Closed)

好多葡國菜餐廳都名過於實。。啲嘢又貴又鹹。。啲肉又韌又鞋。。所以我好努力搵唔同嘅餐廳。。呢間小窩網上評論得好少。。不過都係好評。。加上近官也街。。就即管試下。。上到的士。。司機話冇聽過。。call上台都冇人識。。最後我哋喺北帝廟附近落車。。行入巷仔搵。。舖面唔明顯。。真係兜咗陣先見到。。唔知係咪因為閒日夜晚。。得兩三台客。。靜靜哋都好嘅。。裝修都幾靚。。不過有部電視機播住大台。。有啲奇怪。。一開始食個餐包先。。外脆內軟。。差啲想encore。。不過都係留肚食其他嘢。。（對小朋友嚟講麵包皮就硬咗少少。。）叫咗南瓜湯同薯蓉腸仔湯。。我唔食南瓜。。唔知個湯好唔好飲。。不過小朋友就飲到唔停口。。薯蓉湯都算滑。。幾好飲。。但唔重薯仔味。。有少少失望。。烤乳豬就真係好出色。。皮脆肉嫩。。一啲都唔油膩。。亦唔會燒到乾晒。。唔使點汁都得。。但又唔會勁鹹。。伴碟嘅菜都新鮮爽脆。。飯就冇乜特別。。葡式海鮮飯都幾出色。。份量唔少。。佢寫明係2人份量。。但如果比較細食。。3、4個人食都得。。幾足料。。有蝦、蜆、青口、帶子。。肉質幾好。。但唔係太食得出鮮味。。應該去晒啲飯度。。淨食飯都覺得好好味！不過有少少辣。