Video
Read full review
2012-10-25
4173 views
尋晚晌氹仔嘅「葡國美食天地」食咗餐好嘅，原本打算今日午餐食自助餐，不過表姪女話再想食葡國菜，又想落路環行吓，就決定落路環食葡菜。退好晒房，過咗去金沙城中心逛一陣之後，坐巴士落路環市區，話咁快就到，猶豫緊雅憩好抑或去里斯本地帶好，兩者好評差唔多，最後揀里斯本地帶，因為佢嘅小屋環境佈置確實佔多好多印象分。路環市區比氹仔仲要細，所以以為水鴨街8號好易搵，點知就喺太細好易走過籠，問問人，行番轉頭入條巷仔就見到，唓！原來就晌安德魯餅店（老店）隔離條巷仔就喺喇。門口無乜太多特別，但入到去就好唔同。樓高兩層，地下層連廚房，面積較細，不過已坐咗幾枱客，睇外貌及講嘢音調似喺葡國人士；而我哋3個人被引領上二樓，木瓦天花，白牆白枱布，牆上一排餐酒，加上樓底高，環境簡約得嚟不失雅致，而且枱凳拍得唔逼，成個二樓又得我哋一枱客，頓感更舒適寧靜，甚有在家食飯嘅感覺。麵包籃．橄欖小吃未點菜，葡藉侍感就送嚟麵包籃同橄欖小吃。兩大個自家製嘅餐包，已窩心哋切開一片片，方便食用，麵包微暖，雖然有橄欖油提供，我都喺鍾意塗上牛油，油香鬆軟好食。橄欖有青、黑兩款，比一般食到嘅無咁鹹，一口麵包，一口橄欖，已經喺一個唔錯嘅餐前小食。今
退好晒房，過咗去金沙城中心逛一陣之後，坐巴士落路環市區，話咁快就到，猶豫緊雅憩好抑或去里斯本地帶好，兩者好評差唔多，最後揀里斯本地帶，因為佢嘅小屋環境佈置確實佔多好多印象分。路環市區比氹仔仲要細，所以以為水鴨街8號好易搵，點知就喺太細好易走過籠，問問人，行番轉頭入條巷仔就見到，唓！原來就晌安德魯餅店（老店）隔離條巷仔就喺喇。
門口無乜太多特別，但入到去就好唔同。樓高兩層，地下層連廚房，面積較細，不過已坐咗幾枱客，睇外貌及講嘢音調似喺葡國人士；而我哋3個人被引領上二樓，木瓦天花，白牆白枱布，牆上一排餐酒，加上樓底高，環境簡約得嚟不失雅致，而且枱凳拍得唔逼，成個二樓又得我哋一枱客，頓感更舒適寧靜，甚有在家食飯嘅感覺。
麵包籃．橄欖小吃未點菜，葡藉侍感就送嚟麵包籃同橄欖小吃。兩大個自家製嘅餐包，已窩心哋切開一片片，方便食用，麵包微暖，雖然有橄欖油提供，我都喺鍾意塗上牛油，油香鬆軟好食。橄欖有青、黑兩款，比一般食到嘅無咁鹹，一口麵包，一口橄欖，已經喺一個唔錯嘅餐前小食。
今餐就無點Sangria，一來尋晚飲咗，讓表姪女都試到；二來仲有半日行程，點支1.5L礦泉水可以喇，承惠MOP29。嚟過澳門食葡菜嘅人都知，依度啲餐廳唔包費免開水。晌度順帶講講服務，雖然成樽礦泉水放晌枱上，但侍應哥仔一樣招呼周到，佢企晌遠處近樓梯位，久唔久過嚟幫忙斟水，但又唔會企實眼定定望住你，令你好唔自在咁。
八爪魚沙律 MOP105細細碟，但非常好食，大家一致都讚。與其叫沙律，不如叫涼拌海鮮或者海鮮小碟，因為佢個製作跟起源於南美嘅Ceviche挺相似，之前晌中環Tango同灣仔LeChef接觸過。八爪魚切成小件，伴有洋蔥粒、香草、油醋撈勻而成，既開胃味道又恰如其分。其實內裡八爪魚肉幾多，味鮮而柔軟，後尾佐以麵包做成小片八爪魚多士，仲正呀！
非洲雞件焗薯仔、青菜沙律 MOP129非洲雞喺一道出名葡菜，一直想試，不過又實在太多葡菜想試，卒之，機會就在今天。以陶盤盛載嘅非洲雞，送嚟香噴噴，充滿椰香，雞隻外皮焗得金黃，賣相極佳，色香俱全，味道又如何？雞肉都幾嫩口，滲有蒜香同椰子味，再者一客一隻雞嘅份量，足4-5人食有餘。精彩之處仲未完，伴菜有焗薯仔同青菜沙律，前者一流，薯仔刨成薄片，一層疊一層加忌廉同芝士嚟焗，上碟時亦刻意切成長形，工整好睇，而薯味濃，又香軟，忌廉配芝士多朕柔滑感，實在好食，跟下面燒沙甸啲烚薯就差好遠；而後者喺一啲沙律菜、青瓜片、甘筍、蕃茄、洋蔥，作為平衡一下非洲雞嘅濃膩。
燒沙甸 MOP120老婆揀嘢食，一喺湯，一喺魚，依兩樣就喺佢首選。尋晚食完燒鱲魚，今日又要一份燒沙甸，年初晌黑沙海灘嘅法蘭度已食過一次燒沙甸。講抵食，就一定法蘭度抵晒，一客4條兼且大大條，仲要賣MOP98。相反，里斯本嘅沙甸較細條，肉地相對薄，但燒得都仲喺香口，伴菜有酸菜同烚薯，烚薯伴魚，可能喺葡菜特色，次次食親燒魚都喺伴烚薯。有得揀，小弟都喺鍾意啲焗薯囉！
又一餐食得好，食得開心。里斯本唔收加一，慳番幾十蚊，可以當免費晌安德魯餅店食件葡撻，加件蛋糕。Post
