新帆船餐廳 (Closed)

去到澳門，例必要去食番餐葡國菜，因趕住睇SHOW，要提早食晚飯，所以唔使等位，入到去得一兩枱客，餐廳佈置好有葡國色彩，哈﹗又有啲似隻船；今次坐近窗口，夠光猛開揚。今次點咗一個頭盤，兩個主菜SHARE嚟食；頭盤燒沙甸魚，主菜薯條炒馬介休同紅酒燴牛尾。首先上嘅菜唔係頭盤，而係薯條炒馬介休，馬介休加埋薯條火腿雞蛋洋蔥炒過，鹹鹹香香，最正就係薯條炒過仲保留少少脆，熱騰騰上碟，非常惹味。第二道上嘅係燒沙甸魚，燒到火候啱啱好，賣相唔錯，聞就有點腥，食落肉質鮮美，完全冇腥味，正﹗最後上紅酒燴牛尾，較前兩道菜遜色，味道和賣相不過不失；跟心形白飯，好浪漫噢﹗要加分。