蕃茄屋葡式美食

Open Now

Now Closed

有好幾日冇寫食評，一嚟病病地，咳到就嚟甩肺；二嚟病咗冇心情搵好嘢食。是日終於好番啲，我又再出動。嚮新馬路噴水池附近，有好多好食嘢在街頭巷尾，只要行多幾步就搵到。今次呢間舖頭要行一陣斜路，雖然都只係七點幾，但條巷都幾靜「英英」。舖面小貓三、兩隻，唔好以為生意麻麻，實情係做好多外賣生意。我叫咗一個行政套餐，包括忌廉雞皇焗魚柳連一杯奶茶。本來還可以揀紅糙米做飯，可惜剛好賣晒。 冇幾耐一碟香噴噴嘅焗魚柳已呈上檯頭。奇怪喇，點解冇匙同埋叉？問侍應，原來飯係分開上，仲有配菜添！睇落都幾大堆頭。配菜係酸菜加青瓜，令人好醒胃。忌廉味唔濃，唔會好似芝士咁特出，適合女士們食用。雞肉味道不張；魚柳係吉列魚柳，加上忌廉汁，又幾好味。整體嚟講，係香但味道又唔會太濃烈，好溫柔，好錫住個肚，如果配埋紅糙米飯都幾健康；奶茶就中規中矩，滑但係唔太香。 一個行政套餐廿八蚊，十分抵食。不過有一個缺點，就係一星期有一日休息，十一月份係逢星期二，下個月都唔知邊日休息，要嚟食似乎要撞吓手神至得。