咁耐冇得去旅行，唔知大家有無啲掛住喺泰國行夜市嘅感覺？以前去得泰國嘅market，人人都必定會食名物香蕉煎餅，不過原來而家喺香港唔少地方都已經有得食喇，而且重發展出好多唔同口味同配搭，今次介紹5間有賣泰式煎餅嘅小食店同餐廳畀大家，等大家喺香港都食到泰國味道！
Foodie泰式煎餅 (旺角)
由80後酒店廚師主理，主打泰式煎餅同鮮果撈嘅小食店。泰式煎餅有八種口味，最特別係有鹹有甜，除咗經典香蕉口味，重有馬來西亞100% D24榴槤煎餅，加入滿滿嘅榴槤蓉，喺表面灑上糖霜，一入口就感受到陣陣榴槤香氣，鍾意榴槤嘅朋友必試！鹹味選擇方面當然唔少得近年最hit嘅「荽」喇，芫荽火腿芝士口味加入火腿絲、芝士粒、芫荽同沙律醬，芫荽味恰到好處又唔會太搶，另外香滑芝麻麻糬煎餅都好值得試，香脆嘅煎餅配上煙韌麻糬，口感係幾特別嘅。
圖: 泰小子 (屯門)
屯門呢間泰式煎餅開業冇耐就已經儲咗唔少fans，曾經創下日賣200份嘅紀錄，真係唔簡單！呢度嘅煎餅搓得好薄身，即叫即煎，所以食落特別脆口。口味方面就以甜味為主，除咗常見嘅朱古力香蕉、榛子醬香蕉等，店主將時下港人最鍾意嘅食物加入煎餅中，如芝士紫薯煎餅同芝士榴槤煎餅，兩款口味都甜鹹交錯，反而冇淨係甜味嘅煎餅咁易膩。鹹味方面芝士肉鬆都唔錯，加入雞蛋、肉鬆、芝士及沙律醬，好惹味！
圖: 香蕉仔 (元朗)
前年結業、元朗超人氣嘅泰式香蕉煎餅，今年年頭喺原址重開返，重keep住長期都大排長龍～唔同口味嘅香蕉煎餅，每一份都熱辣辣，一共有8種口味，甜味包括招牌原味、榛子醬、煉乳、朱古力、阿華田同花生醬。外層香脆，香蕉份量又足！溫馨提示營業時間由16:00開始，預計等待時間為45-60分鐘，有心試嘅朋友仔可以拎咗籌再去行下街先。
圖: tiffsuet
泰谷 (荃灣)
近幾個月先開，位於荃灣路德圍嘅泰式小食店，泰式煎餅有香蕉同榴槤兩款口味，可以自選朱古力醬或煉奶，外脆內軟而且味道香甜。除咗煎餅，舖頭亦有唔少小食都幾有驚喜，如鐵板龍蝦海鮮炒麵，選用泰國龍蝦，龍蝦彈牙而且燒得唔乾身，而醬汁可選蒜味、黑椒同最人氣嘅冬陰公醬，好有泰式風味！
Samsen 泰館 (上環)
米芝蓮必比登推介嘅泰國菜，亦係灣仔人氣船麵店泰麵嘅姊妹店，好多人都係為招牌和牛船麵、咖喱麵同Pha Thai而去，但原來Banana Roti一樣咁受歡迎！大廚會將煎好嘅薄餅面，夾入香甜嘅香蕉，最後再放上鐵板煎一煎後上碟，淋上大量煉奶，咬落去係勁薄脆又充滿煉奶香甜，好出色！另外仲可以加埋Nutella㗎～
圖: 文: Yanica
編：Kar
