「糭」情鮑魚　七款豪華端午糭

唔知由幾時開始，一隻糭入面，鮑魚成為咗主角，鹹蛋黃只係第二主角？食糭個陣見到原隻鮑魚，比起食中鹹蛋黃更開心，更滿足！今年唔少星級餐廳都推出咗以鮑魚為主題嘅糭，認真豪華呀！

足料鮑魚十穀糭　龍景軒

呢隻「鮑魚瑤柱有機十穀糭」絕對可以用「足料」嚟形容，大隻到四個人share先掂呀！入面加入咗17頭南非鮑魚、脆皮燒肉同燒鵝，用料豐富，喺傳統口味中加入粵菜元素。另一亮點係選用咗含纖維嘅有機十穀米，食糭都食得健康啲。

全港限量500隻　尚鮑

由鮑魚專門店聯乘老字號推出嘅「特大原隻南非鮑魚瑤柱上海糭」當然要試，見到原隻鮑魚零舍興奮。鮑魚以慢煮方式密封烹調，真空袋內保留晒鮑魚骨膠原精華，再將呢啲精華混入糯米中醃浸，令到粒粒糯米都吸收晒鮑魚嘅鮮香。另外配埋金華火腿、日本瑤柱、鹹蛋黃等，淡淡鹹香，層次分明~全港限量500隻咋！

12頭南非鮑魚　明閣

呢間米芝蓮星級餐廳首度推出手工原隻鮑魚裹蒸糭，入面有12頭南非鮑魚、日本瑤柱、天白花菇、燒鴨肉等，脂香四溢！禮盒仲送埋自家出品XO醬，用瑤柱、蝦米、金華火腿等精製，配埋一齊食特別香口！

鮑魚瑤柱裹蒸糭　逸東軒

米芝蓮一星食府推出嘅至尊鮑魚瑤柱裹蒸糭，入面當然唔少得原隻鮑魚！仲有瑤柱、花菇、鹹蛋黃、金華火腿等，綠豆糯米比例平均，口感豐富紮實。

鮑魚有機腩肉糭　夏宮

鍾意食傳統味道嘅，呢隻鹹糭就啱晒！加入咗鮑魚、瑤柱、有機豬腩肉、鹹蛋黄等，傳統味道中見矜貴。

鮑魚松茸裹蒸糭　星宴中餐廳

呢間酒店嘅「鮑魚瑤柱松茸裹蒸糭」選用矜貴食材，有鮑魚、瑤柱、松茸等，濃郁嘅鹹香中滲出松茸嘅清香，味道有層次！

鮑魚燒鵝裹蒸糭　鷹巢 

想食得豐富，仲想啖啖肉，得鮑魚係唔夠㗎！呢隻裹蒸糭有原隻鮑魚又有燒鵝，大滿足！入面當然仲有鹹蛋黃、冬菇、瑤柱等配料，用料豐富，記得同人happy sharing啦~

文﹕Kiko
編：Kar