是咁的，正當中秋月餅有抹茶、流心同乳酪雪糕等新派，同奶黃、蓮蓉蛋黃等傳統派嘅時候，突然一陣曲奇香氣傳嚟......曲奇都可以變身？無錯，女神欣宜有份開設嘅呢間曲奇店趁住中秋推出咗兩款唔同口味嘅月餅軟曲奇，創新用軟曲奇皮搭傳統月餅餡，估唔到咁夾！

月餅軟曲奇禮盒裡面有兩款唔同口味，青天有金箔喺面，切開一睇原來係奶黃蛋黃餡。軟曲奇皮酥軟有牛油香，配埋自家制唔太甜嘅奶皇同畫龍點睛嘅蛋黃，香得嚟又唔膩。

另一款用銀箔點綴嘅就叫蓮妹，名副其實係蓮蓉蛋黃月餅軟曲奇。蓮蓉香滑不在話下，而當蓮蓉同鹹蛋黃遇上美式軟曲奇，意外地又幾Match啵。

原來欣宜同大家一樣，由細到大都鐘意食月餅，但傳統月餅好容易就會覺得膩。所以今次就將傳統月餅變成餡料，再用欣宜最愛嘅煙韌軟曲奇包住，Size啱啱好，過足口癮又唔會飽到食唔落其他應節美食。

月餅軟曲奇新舊融合得嚟，禮盒包裝亦相當有心思，低調黑色上面加樹葉暗花嚟代表中秋，圖章四四方方但原來係品牌英文名。月餅軟曲奇全部獨立包裝，兩款口味仲有兩款唔同圖案，方便辨識之餘又有玩味，一啲都唔「老餅」。

欣宜同開飯仔開Live嘅時候，仲話嚟緊會有更多新搞作，到底係新Pop-up Store定節日限定曲奇呢？各位Fans記得密切留意喇。

Homie Cookies 月餅軟曲奇禮盒
*禮盒內含3件奶黃蛋黃月餅軟曲奇，及3件蓮蓉蛋黃月餅軟曲奇
*可到尖沙咀門市或網站預訂，2016年8月31日前可享預訂優惠