卡通主題Cafe開極都有，今次輪到相信係唔少七八十後都玩過嘅遊戲星之卡比，而且係大阪同東京兩個地方都有期間限定Cafe，方便Fans暑假飛去日本，野生捕獲唔同星之卡比嘅主題美食！

今次主題Menu選擇都唔少，正餐方面一定係呢個墨魚汁海鮮咖喱飯最吸睛，因為係比較少見嘅黑色！令中間粒黃色星星，即係黃薑飯更突出更Sharp。

其他主食由可以氹小朋友食多啲蔬菜嘅番茄野菜意粉，啱哂女士Keep Fit嘅芒果火腿冷麵，到食肉獸男士都啱食嘅烤肉拼盤都有，又幾細心喎。

去到主題Cafe又點少得卡通造型甜品呢？呢個星之卡比紅莓Pancake真係得意到唔捨得切呀！

另外仲有星之卡比泡芙同Cupcake，精緻得嚟仲可以外賣㗎。

最後嘆埋杯Colorful嘅特飲，或者香濃嘅朱古力芭菲，無論相機定肚皮都一定好滿足。咩話？你無錢無假飛唔到去日本？咁......同開飯仔一樣睇咗當食咗啦。

KIRBY CAFÉ 大阪店
活動日期：2016年8月5日至9月4日
地址：大阪府大阪市北區梅田3-1-3 ルクア イーレ10F ルクアダイニング カフェ ラ・ポーズ

KIRBY CAFÉ 東京店
活動日期：未定，預計在2016年8月開始
地址：東京都墨田區押上1-1-2 東京スカイツリータウン・ソラマチ

資料來源：カービィカフェ 公式サイト