唔單止香港人愛抹茶，日本人亦非常鐘意抹茶製品，特別最近係出新茶嘅季節，特別多餐廳會推出抹茶甜品。今次係日本連鎖家庭餐廳Denny’s，平時去Denny’s都係食扒多，但今次嘅宇治抹茶甜品相當有和風感，連Tiramisu都係用碗！

平時食Tiramisu都係西式杯裝多，今次呢個宇治抹茶Tiramisu換咗碗就即刻有庭院和風感覺！除咗意大利軟芝士同抹茶Crumble之外，仲有白玉、抹茶啫喱同士多啤梨醬，係和風洋風並重嘅Fusion甜品。

其餘三款甜品亦相當有Fusion感，宇治抹茶Pancake嘅厚身Pancake中間既有紅豆亦有士多啤梨醬。不過重點當然係上面嘅京都宇治抹茶醬，見到呢個墨綠色就覺得味道一定非常濃郁！而且旁邊嘅係焙茶Crumble同抹茶雪糕，抹茶Fans一定大愛！

最後仲有宇治抹茶新地同宇治抹茶迷你芭菲，一樣都係用咗京都宇治抹茶，層次分明而且睇得出材料十足，未食都Feel到涼浸浸。

最後嚟個相關小知識，家庭餐廳係一種必一般餐廳價錢相宜同性價比高，同時比快餐店或者立食店舒適，適合一家人用餐嘅餐廳。日本嘅家庭餐廳通常都係連鎖經營，而且唔少都可以比錢任飲飲品。家庭餐廳嘅菜式各異，但都會有漢堡扒，因為呢款係所有日本媽媽都會整嘅料理。雖然去餐廳叫份漢堡扒餐再食個抹茶芭菲好似有少少九唔搭八，不過好食就無問題啦。

資料來源：デニーズ