新舖開咗接近一個月，採用半自助式服務，除咗其他分店飲到嘅咖啡、同沙冰等等外，hand drip coffee都有得飲，啲咖啡豆係嚟自肯亞、哥斯達黎加等等唔同嘅地方，由師傅即場沖製㗎。
唔止咁，熱食方面仲有千層闊麵、水牛芝士pizza等等，其中有道小食，香脆雞翼真係要講講。炸雞翼嚟嘅，得呢間monogram店先有得食㗎咋。炸嗰陣係混埋啤酒炸漿一齊炸，敏銳度高嘅朋友應該會食到淡淡嘅啤酒香。而呢隻雞翼有兩種醬點，一係濃味少少嘅沙嗲醬，香而不辣，另一種係清新啲嘅柚子沙律醬，柚子加蛋黃醬等等自家製嘅，杰身少少但係柚香味幾出。
當然唔少得香港人嘅至愛——甜品啦，所有甜品都係配movenpick雪糕㗎，係咪即刻心心眼咗先？有款「香港經典窩夫配特濃咖啡雪糕」，叫得香港經典，當然就係用咗經典組合啦，一格格嘅厚窩夫係配花生醬加煉奶呀，好似格仔餅咁。不得不提係，啲煉奶食得出唔係普通巿面食開嘅煉奶，問一問，原來係師傅加埋拖肥落去整㗎，啱晒甜魔。
而作為一間咖啡店，甜品點少得Affogato？叫返杯冧酒提子雪糕咖啡，雪糕底有細細粒嘅黑糖啫喱同浸過冧酒嘅提子乾，上枱後快快手手將熱嘅espresso倒落雪糕度，一冷一熱、一甜一苦，夾埋就係豐富。
BTW，呢間暫時都只係Pop up store嚟咋。
文：Kar
隨時接收最新資訊
讚好OpenRice專頁！