聖誕有幾日假期，除咗之前建議過嘅自製聖誕曲奇/蛋糕外（傳送門按此），仲有咩可以做？有冇諗過上船出海，望住維港兩岸景色，好Chill咁嘆返個下晝？成日喺中環或尖沙咀碼頭見到嘅帆船張保仔號，最近換上聖誕裝，船上餐飲亦推出咗聖誕特別套餐，一齊跟電台主持歪歪上船體驗下另類聖誕活動啦。

 張保仔號

張保仔號船高兩層，由2006年開始起航，而家主要有尖沙咀同中環兩條航線，最遠會駛到筲箕灣、鯉魚門嗰邊再調頭返嚟，成個航程大約個半鐘左右。臨近聖誕，船身佈滿聖誕裝飾，仲有聖誕馴鹿同聖誕樹添，好多打卡位。喜歡嘅更可走出船艙，吹下海風，相當有feel。

 歪歪實試

 聖誕版「點心航遊之旅」

如果選擇下晝上船嘅朋友仔，就可以同歪歪一樣，試到聖誕版嘅「點心航遊之旅」。點心用迷你版張保仔號盛住，幾個木盒內分別裝有懷舊同新派嘅點心，例如叉燒包同酥皮蛋撻等。燒賣同蝦餃則變奏成黑蒜燒賣同黑松露蝦餃。

酸菜鱸魚春卷

(左) 酸菜鱸魚春卷 ︳ (右) 黑椒和牛酥

「你點諗到春卷裡面係有酸菜鱸魚？」呢個配搭又幾新鮮，外脆內軟。「酸咪咪又幾得意喎，估唔到酸菜魚又可以夾落春卷度，都唔錯。」

黑椒和牛酥

「其實睇個樣佢似以前嗰啲蘿蔔絲酥餅，點知佢裡面係和牛，仲要係黑椒和牛，我都佩服呢度嘅創意。」一絲絲嘅外皮經油炸後，口感酥脆， 黑椒味幾突出。

聖誕雪人栗子包

最後要特別介紹一下呢個，聖誕期間會化身成聖誕雪人嘅栗子包，造型好得意。「喺呢個咁凍嘅天氣，喺船出面食一個栗子餡嘅包，竟然裡面仲係熱辣辣嘅。再加埋栗子就係冬天必食啦，仲要雪人設計，成件事勁有聖誕氣氛。」

而如果你選擇夜遊維港嘅話，仲分分鐘會遇到聖誕老人同助手同船，有得合照之餘，小朋友仲會有禮物收。嘆多款熱朱古力，就又甜又暖啦。溫馨提示一下，上船嘅話要早啲book定啊。預祝大家有個快樂聖誕。

張保仔
地址: 中環/尖沙咀 海上
(上船地點: 中環九號公眾碼頭 / 尖沙咀一號公眾碼頭, 文化中心旁邊)
詳情按此

主持：歪歪

文：Kar
相+片：YanYan