【開飯熱店入圍名單巡禮】火熱動「滾」火鍋店

話說今屆開飯熱店大賞又嚟喇，開飯仔就委託咗最Like瓹窿瓹罅搵食嘅喵星人，合組「為食貓偵探團」，上山下海、一帶一路偵查全城大大小小講飲講食情報，廿四小時儘量不眠不休咁四出發掘屬於港喵（oops，唔係，係港人）嘅真正味道。

好天，打邊爐；落雨，打邊爐。成班Friend，打邊爐；一枝公，打邊爐。冬天，梗係打邊爐；夏天，開冷氣咪可以繼續打邊爐囉！香港有齊日式中式、粥底或者補身湯底、逐碟嗌或者放題各式各樣火鍋店，講起火鍋，餓底貓我又開始肚餓啦，Book定枱今晚同美食隊長又「滾」過！睇下佢有咩心水先!

秘製惹味走地雞煲　　常滿雞煲火鍋專門店

Photos by ringow & neicla328
以招牌滋味常滿雞煲做主打，秘製醬汁香口之餘，雞煲仲可以加錢轉走地雞，零雪藏味而且雞肉更有雞味更彈牙。雞煲另有其他口味，例如麻辣同藥膳醉雞就有唔少食客推介。食完雞件當然要加上湯變火鍋湯底，記得嗌佢地嘅手打丸，彈牙又有家常風味，特別啲嘅亦有灌湯麻辣牛丸。其他配料例如梅酒千層肉同鮮炸響鈴卷一樣有心思。

真．港式火鍋店　　鮮入圍煮

Photos by kennykin & Cynthiachan92
餐廳其中以部分裝修學足街市攤檔，有懷舊特色之餘亦可以比食客揀海鮮，抵讃。火鍋以港式為主，其中一個特色湯底就係霸王卸甲火焰雞煲蟹粉鍋，其實即係花蟹同醉雞鍋，即場點火的確夠霸氣，中間仲有半斤蟹粉任點，夠氣派！唔想咁浮誇嘅話，濃厚原隻雞煲花膠湯都係推介之作，濃香滋補。

大熱海鮮粥底火鍋　　聚滿坊粥底火鍋私房菜

Photos by Crystal_koo & TwiggyDerek
因為藝人歐錦棠喺網上推薦過而聲名大噪嘅粥底火鍋店，以抵食同海鮮新鮮為賣點。店按人頭收費，全部清一色粥水湯底，配料就由老闆發版，按當日街市有咩新鮮海鮮同材料安排。海鮮大大件而且的確夠新鮮，食完海鮮再落肉同菜，最後加返米落去煲粥，所有精華都喺碗粥裡面。幫你安排哂每人都係$200有找（飲品另計），難怪長期訂唔到枱！

改良四川麻辣雞煲　　陸陸雞煲火鍋

Photos by stellashea & Minnie10
主打改良過嘅四川麻辣雞煲，麻辣醬汁係用咗三十種香料嘅自家配方，入口帶輕甜但麻味勁，唔食得辣嘅可以從BB辣入手。食完嫩滑入味嘅辣雞之後可以揀清湯或者辣湯開始打邊爐，百花同咸牛肉芝士釀油條分別係將墨魚滑同芝士鹹牛肉釀入油炸鬼，墨魚煙韌彈牙，芝士鹹牛肉就綿軟帶鹹香，嗌一碟雙拼就可以兩樣試哂。

夠足料海鮮鍋　　澳門仔火鍋串燒專門店

Photos by LizzyC & babiland
新派澳門菜餐廳，招牌菜係澳門海鮮乳豬豬骨煲。但除咗澳門菜之外仲有好多唔同選擇：雞煲、普通火鍋同新Hit嘅海鮮塔都有！海鮮塔足有七層，最底係湯同米，最後就有海鮮精華粥可以食。海鮮乳豬豬骨煲亦非常大堆頭，唔洗嗌太多配料，細食嘅剩係食鍋裡面嘅海鮮可能都已經夠。

和風美顏湯底　　大和豚総本店

Photos by alicehappy & 食在你心
以豚肉作為主題嘅日式餐廳，佢地嘅豚肉美人鍋就夠哂健怡，啱哂唔少想Keep Fit但又鐘意打邊爐嘅女士。豚肉包住野菜，無咁油膩之餘亦比其他火鍋清新，而且湯底係骨膠原湯，可以美顏再加分。另外亦有其他口味，例如松葉雪見美人鍋依然係骨膠原湯底，但配料就加咗松葉蟹同蘿蔔蓉，更鮮甜。

入圍火鍋最佳熱店嘅仲包括牛一、米走雞、金撈老鴨湯刺身火鍋專門店同尚鮮火鍋海鮮料理。見到啲邊爐湯底相餓底貓我都覺得好餓...不過幾餓都好，去OpenRice 優秀開飯熱店大賞2016網站投票先，有機會贏取超過10萬元豐富獎品㗎嘛！菜式組別3月7日午夜截止喇！投完票就訂枱，搞掂！
投票網站：http://tiny.cc/op_2016

隨時接收最新資訊
讚好OpenRice專頁！