各位鐘意食日本菜、特別係新鮮海鮮嘅為食友注意喇，呢間嚟自東京築地市場嘅人氣海鮮丼專門店最近舉行期間限定嘅熊本祭，引入多款熊本縣產地直送特色食材，身處香港都食到日本鮮甜海鮮，當中八代鏡蠔仲係首次海外輸出！
 

豊洲水産海鮮丼専門店嘅灣仔同油麻地分店由今日(3月1日)開始到4月30日都會有熊本祭期間限定餐牌，而必試嘅就要數到有新鮮海水味而且肉質特別肥厚嘅八代鏡蠔！佢係八代市鏡町海養殖蠔嘅品種，特點係入口香濃Creamy。而且今次係呢個品種第一次輸出日本海外，非常難得。
 

想食到鮮甜滋味，仲有芝麻鯖魚拼炸丸丼可以一試。特別挑選熊本天草產鯖魚，富濃郁魚鮮味而唔腥，加少少熊本芝麻醬同芝麻碎調味更滋味。而另一款熊本海鮮天婦羅丼就有香脆嘅炸琵琶蝦、炸貝柱、炸裙邊同熊本河內鹽味海苔，值得一提嘅丼上面顏色鮮艷嘅彩貝同樣嚟自熊本天草，顏色全天然無添加 。
 

熊本祭餐牌另有四款小食，彩貝天婦羅色彩豐富口感酥脆，意大利風柚子汁天草鯛魚用清新柚子汁帶出熊本天草鯛魚嘅鮮味，照燒油甘魚以餐廳自家配方照燒汁搭熊本天草油甘魚，最後炸魚丸拼醋鯖魚就有熊本天草鯖魚配鹿兒島軟骨魚蛋，各有特色。
 

知道大家想問部長係邊，答案就係只要惠顧熊本祭餐牌上面其中一款丼飯或兩款小食就有印花一個，集齊指定數目印花就可以換到Kumamon精品，各位部長Fans唔好錯過機會呀！

文：Cathy
 


開飯編輯推介：

1. 【專訪】日本人在香港 開餐廳最重要健康行先

2. 1月份好評餐廳十強

3. 2017亞洲50最佳餐廳 地區最佳餐廳全攻略



熱門文章推介：

1. 【一個人開飯】一個人喺大埔食乜好？

2. 【熟食中心尋寶】禾稈冚珍珠 皇后街熟食市場

3. 【二人前指南】港九新界齊最啱拍拖特色Cafe

隨時接收最新資訊
讚好OpenRice專頁！