香港人不嬲都有食神，最近銅鑼灣就開咗間新嘅日本居酒屋，以日本熊本縣天草群島為主題，將當地最出名嘅海鮮帶嚟香港。加上師傅悉心配搭同設計，晚市有各款特別菜式之餘，午市嘅Lunch Set仲相當有驚喜！
 

天草漁場呢間居酒屋顧名思義，目標係將日本天草嘅漁市場搬過嚟香港！背後係由香港嘅經驗豐富嘅日本料理長Do師傅同佢嘅班底，連同天草市政府人員及天草漁市場合力計劃同創立。
 

晚市單點菜式唔少都係以天草著名海鮮為主，例如喜之次塩釜燒就選用油分平均分佈嘅喜之次魚，舖上利尻昆布、粗鹽同幼鹽等，鎅成魚形再燒焗。上枱後用木搥敲開外殼就可以食到裡面嘅嫩滑鮮美嘅魚肉。有得食又有得玩。
 

鰹魚藁燒更加特別用咗天草禾稈草去燒香鰹魚，半熟鰹魚肉口感鮮嫩，放喺岩鹽板上面增添鹹香。
 

炭火燒星鰻同樣選用天草嘅星鰻，特點係肉質嫩滑。伊勢海老浜燒拌櫻味噌蟹醬則以鮮味取勝，龍蝦肉加上海鹽燒製保持原汁原味，櫻味噌蟹醬更用咗多款蟹膏煮成。
 

除咗海鮮，居酒屋仲有唔少特色肉類菜式。天草大王鵝肝雞翼用嘅係特有嘅天草大王雞，將法國鵝肝同日本洋蔥釀入雞翼，再加海鹽同蒜蓉燒製。天草黑毛和牛厚燒亦特別揀咗A5級黑毛和牛當中肉味比較重嘅西冷部份，燒至半熟再放上火山石板保溫。
 

想食得抵啲，不妨等到5月1號嚟試佢地午市開始嘅Lunch Set。不知火海丼其實係火灸魚生飯，先用火槍輕灸再加入96%嘅日本Vodka去做火灸效果，香氣十足。
 

另一推介係鮪魚煙木丼，鮪魚丼上面鋪滿腦天、魚腩、魚背、脂肪層筋等吞拿魚唔同部位嘅刺身。上枱前再用煙薰槍打入蘋果木煙進行煙薰，食嘅時候會聞到淡淡蘋果香，配合油脂香充足嘅吞拿魚刺身，相得益彰。
 

天草漁場
地址：銅鑼灣渣甸街60-66號6樓

文、相：Cathy