【3月自助餐推介】（四）紫薯控必食下午茶

3月真係有口福，之前同大家介紹過幾個主題自助餐，最近又有酒店推出另一個主題buffet，係法式朱古力x紫薯甜品呀！不過呢個淨係得下午茶時段有㗎咋留意返。

紫薯火焰雪山

紫薯迷就算幾咁鍾意食紫薯，平時畀你每次食咪最多都係一件起兩件止？去邊度可以一次過食到咁多款紫薯甜品，仲要任食唔嬲喎？首先要介紹嘅一定係紫薯火焰雪山！呢個雪山係包含咗海棉蛋糕、雪糕、紫薯蓉、蛋白同拔蘭地㗎！嗱，大概呢是咁做的，海棉蛋糕面就放3種味嘅雪糕，雪糕同雪糕中間呢又夾多啲海棉蛋糕同埋重點嘅紫薯蓉，再用蛋白霜蓋住放入焗爐，最後淋埋拔蘭地，完！聽到都好想食，不過呢個雪山係每日限量供應㗎，嗚呀！

紫薯栗子撻

紫薯控淨係睇到呢個撻個樣，應該已經立時心心眼咗！擠到高一高嘅紫薯蓉，中間夾住嚟自法國嘅粟子蓉，而撻皮就係牛油撻皮，成個撻香甜得嚟又唔會太膩。

紫薯窩夫

自助餐自助到一個咩地步？連窩夫都自助好冇？廚師一早已經調校好晒紫薯漿，大家可以隨住自己嘅喜好，想要幾多紫薯就搽幾多紫薯漿，連同其他配碎即係朱古力碎呀、花生醬呀、煉奶呀等等，成個紫薯窩夫嘅份量就由你嚟決定喇！

自家製芥末朱古力

除咗紫薯，另一半主題係法式朱古力，其中要講嘅就係呢款「芥末朱古力」，係主廚自己設計㗎，用芥末蓉med埋法國朱古力嚟整，甜中一點辣，係特別嘅，係有驚喜嘅。

詳情：

1 + 1 吧
電話：2694 3869
供應時間：2:30pm - 5:30pm

文:Kar

隨時接收最新資訊
讚好OpenRice專頁！