長假期有排都未到，平日周末難得放假，當然要爭取時間食好東西！今次開飯仔搵到中環呢間餐廳可狂擦法國、愛爾蘭、南非3國生蠔，生蠔迷有福啦，快睇詳情先！

任食嘅生蠔款式會視乎當日生蠔貨量而定，採訪當日有法國Fine De Claire Verte、愛爾蘭Harty及南非Namibia 3款。

南非Namibia生蠔（左）海水味雖然偏淡，但蠔肉都幾爽口。而愛爾蘭Harty生蠔（右）同樣爽隻，但口感較為creamy。

至於法國Fine de Claire Verte生蠔，吸收咗特別嘅海藻後，令蠔殻以及蠔肉均帶有天然嘅寶石綠。蠔肉不算好肥美，但勝在鮮甜，而且海水味濃，味道一流。

餐廳亦跟送三文魚子、黑魚子作配料，食落更加鮮甜。

任食生蠔優惠是咁的，由即日起至4月26日，客人只要喺餐廳柯打任何正價食品或飲品滿$200，加$199即可享生蠔任食優惠。齋聽似乎不算好抵食，不過同三五知己一齊去食，開支白酒嘅話就夠晒數，好似呢支（左）Germany Pieroth Burg Layer Schlosskapelle-Nahe，甜甜哋，易入口，配生蠔一流，價錢為$68/杯、$298/瓶；如果你唔係好酒之人，可以選擇主菜、小食或無酒精梳打飲品，例如（右）巨峰提子梳打，價錢為$32/杯、$88/jar。

主菜推介12安士嘅炭燒美國頂級肉眼扒($398)，口感軟腍又夠juicy，好啱同朋友分享。除咗有一大塊肉眼扒，仲有分量多多嘅黑松露薯蓉、薯仔及配菜，松露香氣非常，搭配無得輸嘅薯蓉，無疑為牛扒大加分。

除以上優惠，客人亦可以試吓刺身拼盤(優惠價$88、原價$250)，拼盤有左口魚裙邊、三文魚、赤貝、甜蝦及加拿大翡翠螺5款，味道鮮甜。

醬料有日本豉油、Wasabi之外，仲有自家製青瓜柚子醬，口感清新又醒胃。

而家每位客人一入座，餐廳即刻送上welcome oyster一隻，款式不時轉換，正呀！

Oyster Station Snack & Oyster Bar
地址：中環蘭桂芳15-16號協興大廈6樓

文：Joy