元朗呢個美食集中地，最近又開咗幾間好似幾吸引嘅新店，其中一間就係呢間主打台灣古早味蛋糕嘅小店，細細個舖位，開業都不過係一兩星期，但每次蛋糕一出爐，門口就即刻出現人龍喇！

暫時只係得3款口味：原味、芝士味同肉鬆味嘅蛋糕，係店主特地飛過台灣跟師傅學整嘅。成個過程幾乎係全人手製作，都幾多功夫下，所以每日都唔整得太多，三款夾埋大約每日出爐250個到啦，想食都真係要睇埋時機。

原味蛋糕就係由最基本最簡單嘅材料，蛋、奶、麵粉、糖、油而製成，一底分到10件，件件都漲卜卜厚厚der，聞落仲好香添，好治癒。但買咗返嚟，真係要開心些牙多幾個人食，先至食得晒呀。

至於芝士味，就係喺蛋漿中間舖上兩層澳洲芝士，密舖嗰隻喎，無論你食邊邊定係中間位，都一定係啖啖有芝士！不過芝士控可能會有些少失望，雖然佢有兩層，但芝士味都係略為輕咗少少。蛋糕口感就都幾鬆軟嘅。

而肉鬆仲有三層添！係原裝台灣進口嘅肉鬆嚟，焗完之後脆脆地，好彩嘅話仲會有塊脆紫菜添。

點先食到？睇彩數啦，每日冇固定嘅出爐時間，亦都冇得預先落訂，不過放心，舖頭會將預計蛋糕出爐時間貼出嚟嘅，而每輪每款口味會出20個，咁想食嘅就喺門口排隊等下啦。

一肥貓古祖味蛋糕
地址：元朗又新街 27-29號建威大廈地下 7 號舖

文、相：Kar