近排電影復仇者聯盟4上映可謂一票難求，買唔到飛？去中環區呢間新開玩味餐館復仇者餐館試吓啦。餐廳由全民造星嘅Jason張匡佑同女朋友Karen開設，但同套電影係完全無關。純粹係Jason有一次去食飯，無意中聽到隔離枱喺度為朋友計劃復仇大計，印象特別深刻。佢就覺得食飯嘅時候，閒談間少不免會分享負能量，所以復仇者呢個名就咁誕生咗。

至於點解會以茶為主題，Jason話因為佢同女朋友都鍾意茶，佢地就諗如果用茶做核心沖調唔同飲品同製作食物會係咩效果，繼而衍生咗餐廳現有嘅茶類餐點出嚟。

餐館內開設咗一個復仇信箱畀大家匿名寫紙仔，亦會有人匿名回信。

普洱茶香雞翼($68)

加入普洱茶葉、八角、月桂葉及肉桂等材料，逐份煮好後拎去雪凍，普洱茶及八角味道重，好入味，夏天食就一流！

自家包芝士黑松露好好味煎餃(6件/$68、8件/$78)

將黑松露及芝士加入豬肉餡，肉味重。而且喺選餃子皮方面亦用咗唔少心思，特意挑選比較簿嘅外皮，就算煎都唔會覺得膩。

港式卡邦尼炒腸粉($98)

Jason就覺得坊間嘅卡邦尼汁其實有好多唔同版本，既然係咁不如就整個有香港特色嘅卡邦尼，所以就誕生咗呢個卡邦尼炒腸粉。腸粉吸晒卡邦尼醬汁，食落又幾夾！

鹹蛋黃醬炸薯條($48)

鹹蛋黃醬炸薯條就唔使講，鹹蛋味香，越食越順口，叫一份同朋友傾住偈慢慢食就最啱！

雖然喺復仇者餐館Jason 係一位沖茶員，但其實佢同時都兼備音樂人呢個身份，所以餐廳飲品啲名都好有創意，佢話當初飲一啖，腦海中浮現邊一句歌詞，就用佢嚟命名㗎啦～例如洛神花荔枝紅茶叫才值得勾勾手指發誓；蜂蜜檸檬鐵觀音就叫能持續獲得糟蹋亦滿足。真係睇到個menu都忍唔住唱返兩句～

才值得勾勾手指發誓(洛神花荔枝紅茶)($48)

能持續獲得糟蹋亦滿足(蜂蜜檸檬鐵觀音) ($48)

凍OT ($98)

餐廳內最受歡迎的Cocktail，模仿茶餐廳嘅凍檸茶，用威士忌酒做底，然後加入濃濃嘅大紅袍茶，味道易入口，平時去茶餐廳飲開凍檸茶嘅朋友要試吓！

>

凍OT杯邊沾上砂糖，入口時味道無咁酸。

溫馨一提，餐廳內所有餐點都係即叫即整，所以可能要畀少少耐性等吓，慢工出細活啊嘛！

復仇者餐館

地址: 中環蘇豪嘉咸街45A號1樓

文: Yanica

相、片: Tom Li