留意開本地飲食潮流嘅朋友仔應該都會留意到，近年十字牌牛奶都有唔少搞作，例如期間限定嘅綠茶牛奶同紫薯牛奶咁。最近居然「撈過界」變埋港式懷舊冰室，賣樽仔奶茶同新派常餐All Day Breakfast？
最近喺西環西營盤新開嘅呢間十字冰室，其實由同十字牌同一集團嘅餐飲公司管理，叫得做十字冰室，Menu上面梗係唔少得加入十字牌品牌元素嘅食品啦。例如招牌冰鎮濃滑奶茶用咗十字牌嘅玻璃牛奶樽，仲特別用冰鎮方式，飲得慢都唔怕變淡。
其他招牌菜推介仲有健康嘅十字芒果木瓜牛奶麥皮、濃郁嘅香濃蕃茄牛尾湯通粉，同豐富嘅火腿爆蛋菠蘿包等。值得一提嘅係炒蛋加咗十字牌牛奶，食落自然特別滑溜！
更多【新店直擊】： |
仔細睇餐牌會發現唔少傳統同創新結合嘅菜式，例如既有新派常餐All Day Breakfast，少見嘅Nutella朱古力榛子醬西多士，亦會有傳統菠蘿油。再嘆多杯奶茶，就係港式下午茶嘅Best Choice。
冰室裝修亦用心，霓虹燈牌、復古紅磚牆、懷舊窗花同貼住街招嘅鐵閘都係打卡位。嚟冰室嘆美食嘅時候，不妨亦細心留意下！
文：Cathy
圖：十字冰室Facebook